ដោយដកស្រង់សម្តីពីមន្ត្រីអាមេរិកមួយរូប និងប្រភពមួយដែលដឹងអំពីបញ្ហានេះ សារព័ត៌មាន Axios កាលពីថ្ងៃចន្ទ (ទី១៦ ខែមីនា ឆ្នាំ២០២៦) បានរាយការណ៍ថា បណ្តាញទំនាក់ទំនងផ្ទាល់ រវាងបេសកជនសហរដ្ឋអាមេរិក លោក Steve Witkoff និងរដ្ឋមន្ត្រីការបរទេសអ៊ីរ៉ង់ លោក Abbas Araghchi ត្រូវបានធ្វើឲ្យសកម្មឡើងវិញ ក្នុងរយៈពេលប៉ុន្មានថ្ងៃថ្មីៗនេះ។

របាយការណ៍នេះបានឲ្យដឹងថា គេមិនច្បាស់នោះទេថា តើការផ្លាស់ប្តូរ រវាងលោក Araghchi និង Witkoff មានខ្លឹមសារយ៉ាងណានោះទេ ប៉ុន្តែវាគឺជាការមានទំនាក់ទំនងដោយផ្ទាល់ដែលបើតាមដឹងជាលើកដំបូង រវាងភាគីទាំង២ ចាប់តាំងពីសង្គ្រាមបានចាប់ផ្តើមកាលពីជាង ២សប្តាហ៍មុន។

ដោយដកស្រង់សម្ដីពីមន្ត្រីអាមេរិក និងប្រភពនោះ របាយការណ៍របស់សារព័ត៌មាន Axios បានបញ្ជាក់ថា លោក Araghchi បានផ្ញើសារជាអក្សរទៅកាន់លោក Witkoff ដោយផ្តោតលើការបញ្ចប់សង្គ្រាម។ ក្នុងពេលជាមួយគ្នានេះ មន្ត្រីអាមេរិករូបនោះបានប្រាប់សារព័ត៌មាន Axios ថា ទីក្រុងវ៉ាស៊ីនតោន «មិនស្ថិតក្នុងដំណើរការជជែកពិភាក្សា» ជាមួយទីក្រុងតេអេរ៉ង់ឡើយ។

ប្រធានាធិបតីអាមេរិក លោក Donald Trump បាននិយាយនៅថ្ងៃចន្ទនោះថា អ៊ីរ៉ង់ចង់ធ្វើកិច្ចព្រមព្រៀងមួយ ហើយពួកគេកំពុង «និយាយជាមួយមនុស្សរបស់យើង»។ អំឡុងពេលថ្លែងទៅកាន់អ្នកសារព័ត៌មាននៅសេតវិមាន លោក Trump បានប្រាប់ថា សហរដ្ឋអាមេរិកមិនដឹងពីថ្នាក់ដឹកនាំថ្មីរបស់អ៊ីរ៉ង់ទេ។ លោកបានបញ្ជាក់ថា៖ «មេដឹកនាំរបស់ពួកគេទាំងអស់បានស្លាប់ហើយ។ យើងមិនដឹងថា យើងកំពុងដោះស្រាយជាមួយអ្នកណាទេ»។

តែយ៉ាងណាក្ដី មន្ត្រីអ៊ីរ៉ង់បានអះអាងជាសាធារណៈក្នុងរយៈពេលប៉ុន្មានថ្ងៃថ្មីៗនេះថា ពួកគេមិនបានចូលរួមក្នុងការចរចាបទឈប់បាញ់ណាមួយជាមួយរដ្ឋបាលរបស់លោក Trump នោះឡើយ៕