ប្រធានាធិបតីអាមេរិក លោក Donald Trump បានប្រើប្រាស់ការផ្លាស់ប្តូរនៅនាទីចុងក្រោយជាយូរមកហើយ ជុំវិញការធ្វើដំណើរទៅក្រៅប្រទេស និងកិច្ចប្រជុំជាមួយប្រមុខរដ្ឋនានា ដោយយកវិធីសាស្ត្រនេះជាឥទ្ធិពលមួយផ្សេងទៀត ខណៈដែលលោកស្វែងរកការមានប្រៀបផ្នែកការទូត និងធ្វើឲ្យដៃគូបរទេសមានការយកចិត្តទុកដាក់ជាប់ជានិច្ច។

សំណើរបស់លោក Trump ក្នុងសប្តាហ៍នេះ ដើម្បីពន្យារពេលដំណើរទស្សនកិច្ចដែលបានគ្រោងទុកទៅកាន់ប្រទេសចិន ដើម្បីជួបប្រធានាធិបតីចិន លោក ស៊ី ជីនពីន ដែលដំបូងឡើយត្រូវបានកំណត់សម្រាប់ថ្ងៃទី៣១ ខែមីនា ដល់ថ្ងៃទី២ ខែមេសា ឆ្នាំ២០២៦ នេះ គឺជាឧទាហរណ៍ចុងក្រោយបំផុត នៅក្នុងគំរូនៃការពន្យារពេល ឬលុបចោលកិច្ចប្រជុំដ៏លេចធ្លោ ដែលលោកសម្រេចចិត្តថា មិនសមនឹងផលប្រយោជន៍របស់លោក។ ពេញមួយអាណត្តិទី១ និងទី២ របស់លោក លោកចូលចិត្តធ្វើឲ្យសម្ព័ន្ធមិត្ត និងសត្រូវ ប៉ាន់ស្មានអំពីផែនការធ្វើដំណើររបស់លោក។ 

ជាច្រើនលើក លោកបានផ្លាស់ប្តូរគំនិតរបស់លោក ពាក់ព័ន្ធនឹងកាលវិភាគ តាមពេលវេលាជាក់ស្តែង ជាកិច្ចប្រឹងប្រែង ដើម្បីបង្ហាញអំណាចជាញឹកញាប់ ផ្ញើសារទៅកាន់រដ្ឋធានីបរទេសនានា ឬចៀសវាងការចង្អៀតចង្អល់ចិត្តណាមួយ។ ក្នុងអាណត្តិទី១ របស់លោក លោក Trump បានលុបចោលដំណើរទស្សនកិច្ចទៅកាន់ដាណឺម៉ាក នៅពេលដែលប្រទេសនោះ បានប្រាប់ថា ដែនដី Greenland មិនមែនសម្រាប់លក់ទេ បានលុបចោលកិច្ចប្រជុំជាមួយលោក Vladimir Putin នៅពេលដែលប្រធានាធិបតីរុស្ស៊ី កំពុងនៅលើផ្លូវធ្វើដំណើររួចហើយ និងបានបង្កឲ្យមានភាពមិនច្បាស់លាស់ថា តើនឹងអ្វីកើតឡើង មុនពេលជួបជាមួយមេដឹកនាំកូរ៉េខាងជើងលោក Kim Jong Un។ 

លើកនេះ លោក Trump ដំបូងឡើយ បានលើកឡើងពីការពន្យារពេលជំនួបកំពូលនៅចិន ក្នុងអំឡុងពេលផ្ដល់សម្ភាសន៍ កាលពីចុងសប្តាហ៍។ លោកបានធ្វើអត្ថាធិប្បាយបែបនេះ ខណៈដែលលោកបានអំពាវនាវឲ្យចិន និងប្រទេសដទៃទៀតជួយលោកទប់ទល់នឹងការបិទច្រកសមុទ្រ Hormuz របស់អ៊ីរ៉ង់ ចាប់តាំងពីសង្គ្រាមជាមួយសាធារណរដ្ឋឥស្លាម បានចាប់ផ្តើមផ្ដុះឡើងកាលពីថ្ងៃទី២៨ ខែកុម្ភៈ។ 

យោងតាមបុគ្គលម្នាក់ ដែលបាននិយាយក្នុងលក្ខខណ្ឌមិនបញ្ចេញឈ្មោះ បានឲ្យដឹងថា ប្រទេសចិននៅតែបើកចំហ សម្រាប់ការបន្តដំណើរការ ហើយមិនទាន់មានទំនាក់ទំនងជាផ្លូវការណាមួយ ពីសហរដ្ឋអាមេរិក ដែលស្នើសុំការពន្យារពេលនៅឡើយទេ។ ក្រសួងការបរទេសចិនមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕