អង្គការសហប្រជាជាតិនៅថ្ងៃអង្គារនេះ បានជំរុញឲ្យអ៊ីស្រាអែលបញ្ឈប់ជាបន្ទាន់នូវការពង្រីកការតាំងទីលំនៅ នៅក្នុងតំបន់វេសបែង( West Bank) ដោយព្រួយបារម្ភកាន់តែខ្លាំងឡើងអំពី «ការបោសសម្អាតជនជាតិភាគតិច» ដោយមានប្រជាជនប៉ាឡេស្ទីនជាង ៣៦.០០០ នាក់ ត្រូវបានផ្លាស់ទីលំនៅ ក្នុងរយៈពេលមួយឆ្នាំ។

របាយការណ៍ថ្មីមួយពីការិយាល័យសិទ្ធិមនុស្សរបស់អង្គការសហប្រជាជាតិ ដោយពិនិត្យមើលរយៈពេល ១២ខែ រហូតដល់ថ្ងៃទី ៣១ ខែតុលា ឆ្នាំ ២០២៥ បានព្រមានថា ការពង្រីកការតាំងទីលំនៅខុសច្បាប់ និងការបញ្ចូលផ្នែកធំៗនៃតំបន់វេសបែងរបស់អ៊ីស្រាអែល កំពុងជំរុញឲ្យមានការផ្លាស់ទីលំនៅ «ដែលមិនធ្លាប់មានពីមុនមក»។

របាយការណ៍នោះ បានបញ្ជាក់ថា៖«ការផ្លាស់ទីលំនៅរបស់ប្រជាជនប៉ាឡេស្ទីនជាង ៣៦.០០០ នាក់ នៅក្នុងតំបន់វេសបែង គឺជាការបណ្តេញប្រជាជនប៉ាឡេស្ទីនយ៉ាងច្រើនក្នុងទ្រង់ទ្រាយមួយដែលមិនធ្លាប់មានពីមុនមក ដែលស្មើនឹងការបណ្តេញចេញខុសច្បាប់ ដែលត្រូវបានហាមឃាត់ ក្រោមច្បាប់មនុស្សធម៌អន្តរជាតិ»។

រួមជាមួយនឹង «ការផ្លាស់ទីលំនៅយ៉ាងទូលំទូលាយរបស់ប្រជាជនប៉ាឡេស្ទីននៅក្នុងតំបន់ហ្កាហ្សា» វាហាក់ដូចជាបង្ហាញពីគោលនយោបាយរួមគ្នារបស់អ៊ីស្រាអែលនៃបណ្តេញចេញដោយបង្ខំទ្រង់ទ្រាយធំនៅទូទាំងទឹកដីដែលគ្រប់គ្រងដោយប្រទេសនេះ ដោយមានគោលបំណងផ្លាស់ទីលំនៅជាអចិន្ត្រៃយ៍ ដែលបង្កើនការព្រួយបារម្ភអំពីការបោសសម្អាតជនជាតិភាគតិច»៕