នៅថ្ងៃអង្គារ (ទី១៧ ខែមីនា ឆ្នាំ២០២៦) នេះ រដ្ឋាភិបាលជប៉ុន បានសម្រេចពង្រឹងការត្រួតពិនិត្យការវិនិយោគបរទេស នៅក្នុងប្រទេស ដោយបង្កើតគណៈកម្មការអន្តរក្រសួងតាមបែបអាមេរិក ដើម្បីការពារការលេចធ្លាយបច្ចេកវិទ្យាសំខាន់ៗ និងព័ត៌មានស៊ើបការណ៍សម្ងាត់។

តាមរយៈការកែប្រែច្បាប់ប្តូររូបិយប័ណ្ណបរទេស និងពាណិជ្ជកម្ម រដ្ឋាភិបាលរបស់លោកស្រីនាយករដ្ឋមន្ត្រី Sanae Takaichi ប្រឹងប្រែងធានាថា ខ្លួនអាចកំណត់អត្តសញ្ញាណការវិនិយោគបរទេសដែលត្រូវបានចាត់ទុកថា មានហានិភ័យ ទាក់ទងនឹងសន្តិសុខសេដ្ឋកិច្ចជាតិ។

លោកស្រី Takaichi បានអំពាវនាវឲ្យបង្កើតទម្រង់បែបជប៉ុននៃគណៈកម្មាធិការវិនិយោគបរទេសនៅសហរដ្ឋអាមេរិក (CFIUS) នៅពេលដែលលោកស្រីបានឈរឈ្មោះនៅក្នុងការបោះឆ្នោតជ្រើសរើសប្រមុខដឹកនាំនៃគណបក្សកាន់អំណាច គឺប្រជាធិបតេយ្យសេរី (LDP) កាលពីរដូវស្លឹកឈើជ្រុះ។

ការបង្កើតគណៈកម្មការនេះ ក៏ត្រូវបានរួមបញ្ចូលនៅក្នុងកិច្ចព្រមព្រៀងរដ្ឋាភិបាលចម្រុះដែលចុះហត្ថលេខាដោយគណពក្ស LDP ជាមួយគណបក្សនវានុវត្តន៍ជប៉ុន (JIP) កាលពីខែតុលាឆ្នាំមុនផងដែរ។ នៅក្នុងសុន្ទរកថាគោលនយោបាយរបស់លោកស្រីទៅកាន់សភា ក្នុងខែកុម្ភៈ លោកស្រី Takaichi បានសង្កត់ធ្ងន់ថា អង្គភាពថ្មីនេះ នឹងជួយបង្កើនប្រសិទ្ធភាពនៃការត្រួតពិនិត្យលើការវិនិយោគផ្ទាល់ នាពេលខាងមុខ។

ការត្រួតពិនិត្យដោយក្រុមដែលបានគ្រោងទុកនេះ នឹងពាក់ព័ន្ធជាមួយក្រសួងហិរញ្ញវត្ថុ ក្រសួងសេដ្ឋកិច្ច ពាណិជ្ជកម្ម និងឧស្សាហកម្ម និងលេខាធិការដ្ឋានសន្តិសុខជាតិ នៅការិយាល័យគណៈរដ្ឋមន្ត្រី៕