ប្រធានាធិបតីអ៊ីស្រាអែល លោក Isaac Herzog បាននិយាយកាលពីថ្ងៃចន្ទថា អឺរ៉ុបគួរតែគាំទ្រការប្រយុទ្ធរបស់ប្រទេសលោកប្រឆាំងនឹងក្រុមហេសបូឡា ខណៈដែលកងកម្លាំងអ៊ីស្រាអែល បានធ្វើប្រតិបត្តិការថ្មើរជើង នៅក្នុងប្រទេសលីបង់។

រដ្ឋាភិបាលលីបង់ បាននិយាយថា មនុស្សជាងមួយលាននាក់ ត្រូវបានផ្លាស់ទីលំនៅ ក្នុងរយៈពេលពីរសប្តាហ៍នៃការប្រយុទ្ធគ្នា ខណៈដែលរដ្ឋមន្ត្រីការពារជាតិអ៊ីស្រាអែល បានព្រមានថា អ្នកដែលបានចាកចេញពីផ្ទះរបស់ពួកគេនៅក្នុងប្រទេសលីបង់ មិនអាចត្រឡប់មកវិញបានទេ រហូតដល់ភាគខាងជើងអ៊ីស្រាអែលមានសុវត្ថិភាព។

ប្រទេសលីបង់ ត្រូវបានអូសទាញចូលទៅក្នុងសង្គ្រាមមជ្ឈិមបូព៌ា នៅថ្ងៃទី ០២ ខែមីនា នៅពេលដែលក្រុមហេសបូឡាដែលគាំទ្រដោយទីក្រុងតេអេរ៉ង់ បានវាយប្រហារអ៊ីស្រាអែល ដើម្បីឆ្លើយតបទៅនឹងការសម្លាប់មេដឹកនាំកំពូលអ៊ីរ៉ង់ លោក Ayatollah Ali Khamenei ក្នុងការវាយប្រហាររបស់សហរដ្ឋអាមេរិក និងអ៊ីស្រាអែល។

អ៊ីស្រាអែលបានឆ្លើយតបជាមួយនឹងការវាយឆ្មក់តាមអាកាសយ៉ាងទូលំទូលាយលើប្រទេសជិតខាងភាគខាងជើងរបស់ខ្លួន និងការឈ្លានពានរបស់កងទ័ព ចូលទៅក្នុងតំបន់ព្រំដែន។

នៅក្នុងបទសម្ភាសន៍ផ្តាច់មុខមួយ លោក Herzog បានប្រាប់សារព័ត៌មាន AFP ថា៖«អឺរ៉ុបគួរតែគាំទ្រកិច្ចខិតខំប្រឹងប្រែងណាមួយ ដើម្បីកម្ទេចក្រុមហេសបូឡា នាពេលបច្ចុប្បន្ន»៕