ការវាយប្រហារដ៏ខ្លាំងក្លាមួយ បានអង្រួនទីក្រុងតេអេរ៉ង់ ប្រទេសអ៊ីរ៉ង់ នាថ្ងៃអង្គារនេះ ក្រោយការទម្លាក់គ្រាប់បែកមួយយប់ ស្របពេលដែលប្រធានាធិបតីសហរដ្ឋអាមេរិកលោក Donald Trump ជំរុញឲ្យសម្ព័ន្ធមិត្តជួយក្នុងសង្រ្គាម ដែលបានហ៊ុមព័ទ្ធតំបន់មជ្ឈិមបូព៌ា និងបង្កភាពចលាចលសេដ្ឋកិច្ចសកល ។

តម្លៃប្រេងបានកើនឡើងជាង ៥ភាគរយបន្ថែមទៀត នៅថ្ងៃអង្គារនេះ ក្រោយប្រទេសជាច្រើនជំទាស់ការទាមទាររបស់លោក Trumpឲ្យពួកគេជួយការពារការដឹកជញ្ជូននៅតាមច្រកសមុទ្រ Hormuz ដែលជាផ្លូវទឹកដ៏សំខាន់មួយចំពោះការឆ្លងកាត់ប្រេងឆៅ និងឧស្ម័នធម្មជាតិរាវ ។

សង្រ្គាមដែលបច្ចុប្បន្នបានចូលដល់សប្តាហ៍ទី ៣ ទៅហើយនោះ បានសម្លាប់មនុស្សរាប់ពាន់នាក់ មើលឃើញអ៊ីរ៉ង់វាយប្រហារសងសឹកលើអ៊ីស្រាអែល និងបណ្តាប្រទេសក្នុងតំបន់ឈូងសមុទ្រ ក៏ដូចជាតំបន់ជួរមុខកំពុងបើកនៅលីបង់ ពេលដែលអ៊ីស្រាអែលធ្វើសង្រ្គាមជាមួយក្រុមហេសបូឡា ។

អ្នកសារព័ត៌មានរបស់ទីភ្នាក់ងារព័ត៌មាន AFP និយាយថា ការផ្ទុះត្រូវបានលាន់ឮនៅរដ្ឋធានីតេអេរ៉ង់ ប្រទេសអ៊ីរ៉ង់ ក្រោយការទម្លាក់គ្រាប់បែកមួយយប់ លាយឡំនឹងសំឡេងផ្គររន្ទះ និងភ្លៀងធ្លាក់ ។

គេនៅមិនទាន់ដឹងច្បាស់ថាតើគោលដៅជាអ្វីនោះទេ ប៉ុន្តែកងទ័ពអ៊ីស្រាអែល និយាយមុននេះថា ពួកគេបានបើករលកនៃការវាយប្រហារលើហេដ្ឋារចនាសម្ព័ន្ធភេរវកម្មអ៊ីរ៉ង់ នៅទូទាំងទីក្រុងតេអេរ៉ង់ ក៏ដូចជាការវាយប្រហារលើលីបង់ ។

ដោយឡែក សារព័ត៌មានរដ្ឋលីបង់ រាយការណ៍នៅថ្ងៃអង្គារនេះដែរថា ការវាយប្រហារនៅពេលព្រឹករបស់អ៊ីស្រាអែល ត្រូវចំអគាររស់នៅរបស់អ្នកស្រុក នៅតំបន់ជាយក្រុងភាគខាងត្បូងទីក្រុងបេរូត ដែលជាតំបន់កាន់កាប់មួយរបស់ក្រុមហេសបូឡាគាំទ្រអ៊ីរ៉ង់ ៕