មន្ត្រីសន្តិសុខជាន់ខ្ពស់របស់រុស្ស៊ីម្នាក់ បានព្រមាននៅថ្ងៃអង្គារ (ទី១៧ ខែមីនា ឆ្នាំ២០២៦) នេះថា ល្បឿន និងការអភិវឌ្ឍ លើការផលិតយានដ្រូនរបស់អ៊ុយក្រែន មានន័យថា គ្មានតំបន់រុស្ស៊ីណាមួយ មានសុវត្ថិភាពពីការវាយប្រហារនោះឡើយ។

លោក Sergei Shoigu លេខាធិការក្រុមប្រឹក្សាសន្តិសុខដ៏មានឥទ្ធិពល និងជាអតីតរដ្ឋមន្ត្រីក្រសួងការពារជាតិរបស់រុស្ស៊ី បានប្រាប់កិច្ចប្រជុំមន្ត្រី នៅក្នុងទីក្រុង Yekaterinburg នៃតំបន់ Urals ថា ចំនួននៃការវាយប្រហារដ៏បំផ្លិចបំផ្លាញរបស់អ៊ុយក្រែន លើរុស្ស៊ី បានកើនឡើង ៤០ភាគរយ ក្នុងឆ្នាំ២០២៥ ដោយឡើងដល់ ១.៨៣០ករណី។

លោក Shoigu ត្រូវបានដកស្រង់សម្តីដោយទីភ្នាក់ងារសារព័ត៌មានរដ្ឋ TASS ដែលបាននិយាយថា៖ «ល្បឿននៃការអភិវឌ្ឍប្រព័ន្ធអាវុធ ជាពិសេសប្រព័ន្ធយានដ្រូន និងវិធីសាស្រ្តទំនើបដែលប្រើ ដើម្បីដាក់ពង្រាយពួកវា គឺសំខាន់ណាស់ ដែលថា គ្មានតំបន់ណាមួយនៃប្រទេសរុស្ស៊ីអាចមានអារម្មណ៍សុវត្ថិភាពបានឡើយ»។

អភិបាលក្រុងមូស្គូបាននិយាយកាលពីថ្ងៃចន្ទថា ប្រព័ន្ធការពារដែនអាកាស បានរារាំងការវាយប្រហារដ៏ធំបំផុតលើរដ្ឋធានីរបស់រុស្ស៊ី ក្នុងរយៈពេលយ៉ាងហោចណាស់ ១ឆ្នាំ ដោយបានបាញ់ទម្លាក់យានដ្រូនរបស់អ៊ុយក្រែនចំនួន ២៥០គ្រឿង កាលពីចុងសប្តាហ៍។ ចំណែកក្រសួងការពារជាតិរុស្ស៊ីបានរាយការណ៍នៅថ្ងៃអង្គារនេះថា យានដ្រូនរបស់អ៊ុយក្រែន ៤២១គ្រឿង ត្រូវបានបាញ់ទម្លាក់ក្នុងរយៈពេល ២៤ម៉ោងចុងក្រោយនេះ៕