នាវាចម្បាំង USS Tripoli របស់សហរដ្ឋអាមេរិក ត្រូវបានគេមើលឃើញធ្វើដំណើរឆ្លងកាត់តំបន់ឆ្នេរសមុទ្រសិង្ហបុរីកាលពីថ្ងៃចន្ទ ត្រូវបានគេរាយការណ៍ថា ស្ថិតនៅតាមផ្លូវទៅកាន់តំបន់មជ្ឈិមបូព៌ា ស្របពេលដែលទីក្រុងវ៉ាស៊ីនតោន បង្កើនវត្តមានយោធារបស់ខ្លួន ខណៈភាពតានតឹងក្នុងតំបន់កើនឡើង ។

មន្រ្តីសហរដ្ឋអាមេរិក ២រូបដែលសុំមិនបញ្ចេញឈ្មោះ និយាយថា មន្ទីរបច្ចកោណ បានបញ្ជូនកងកម្លាំងបន្ថែមទៀតទៅកាន់តំបន់មួយនេះ រួមទាំងនាវាចម្បាំង USS Tripoli ជាមួយអង្គភាពបេសកកម្មសមុទ្ររបស់ខ្លួន ។

នាវា Tripoli ដែលបច្ចុប្បន្នស្ថិតក្នុងតំបន់អាស៊ី-ប៉ាស៊ីហ្វិក មានសមត្ថភាពផ្ទុកយន្តហោះផងដែរ ។ កងម៉ារីន ២.៥០០នាក់បន្ថែមទៀត ត្រូវបានបញ្ជូនកាន់តំបន់មជ្ឈិមបូព៌ា ជាមួយនាយទាហានជើងទឹកបន្ថែមទៀត ។

ប្រធានាធិបតីសហរដ្ឋអាមេរិកលោក Donald Trump បានចោទប្រកាន់សម្ព័ន្ធមិត្តលោកខាងលិចមួយចំនួនថា មិនដឹងគុណ ក្រោយប្រទេសជាច្រើនបដិសេធន៍ការទាមទាររបស់លោកឲ្យបញ្ជូននាវាចម្បាំងទៅអមដំណើរនាវាដឹកប្រេងឆ្លងកាត់ច្រកសមុទ្រ Hormuz ស្របពេលដែលអ៊ីរ៉ង់បន្តគោលដៅទីតាំងប្រេងនៅក្នុងតំបន់ឈូងសមុទ្រ ។

សង្រ្គាមសហរដ្ឋអាមេរិក-អ៊ីស្រាអែលលើអ៊ីរ៉ង់ ឈានចូលដល់សប្តាហ៍ទី ៣ហើយ ដោយគ្មានសញ្ញានៃការបញ្ចប់ ។ សង្រ្គាមមួយនេះ បានសម្លាប់មនុស្សយ៉ាងហោច ២ពាន់នាក់នៅទូទាំងតំបន់មជ្ឈិមបូព៌ា ចាប់តាំងពីអាមេរិក និងអ៊ីស្រាអែលវាយប្រហារអ៊ីរ៉ង់កាលពីថ្ងៃទី ២៨ ខែកុម្ភៈ រួមទាំងក្មេងៗយ៉ាងហោច ២០០នាក់ នៅអ៊ីរ៉ង់ផងដែរ ៕