លោកនាយករដ្ឋមន្ត្រី Donald Tusk បាននិយាយនៅថ្ងៃអង្គារ (ទី១៧ ខែមីនា ឆ្នាំ២០២៦) នេះថា ប្រទេសប៉ូឡូញនឹងមិនបញ្ជូនកងទ័ពទៅកាន់ប្រទេសអ៊ីរ៉ង់ទេ ដោយសារជម្លោះនេះមិនប៉ះពាល់ដោយផ្ទាល់ដល់សន្តិសុខរបស់ខ្លួន ដោយបន្ថែមថា សហរដ្ឋអាមេរិក និងមហាអំណាចផ្សេងទៀត យល់ពីការសម្រេចចិត្តរបស់ទីក្រុងវ៉ាសូវី (Warsaw)។

កាលពីចុងសប្តាហ៍ ប្រធានាធិបតីអាមេរិក លោក Donald Trump បានអំពាវនាវដល់សម្ព័ន្ធមិត្តឲ្យជួយធានាសុវត្ថិភាពច្រកសមុទ្រ Hormuz ខណៈដែលកងកម្លាំងអ៊ីរ៉ង់បន្តវាយប្រហារលើផ្លូវទឹកដ៏សំខាន់នេះ ក្នុងអំឡុងពេលមានសង្គ្រាមរវាងសហរដ្ឋអាមេរិក-អ៊ីស្រាអែល ជាមួយអ៊ីរ៉ង់ ដែលឥឡូវនេះស្ថិតនៅក្នុងសប្តាហ៍ទី៣ ហើយ។

លោក Tusk បាននិយាយមុនកិច្ចប្រជុំរដ្ឋាភិបាលថា៖ «រដ្ឋាភិបាលប៉ូឡូញ មិនមានគម្រោងធ្វើបេសកកម្មណាមួយទៅកាន់ប្រទេសអ៊ីរ៉ង់នោះទេ ហើយការសម្រេចនេះមិនបង្កឲ្យមានមន្ទិលសង្ស័យណាមួយពីសំណាក់សម្ព័ន្ធមិត្តរបស់យើងទេ»។

លោក Tusk បានបន្ថែមថា ករណីនេះគ្របដណ្ដប់លើកងកម្លាំងផ្លូវគោក អាកាស និងកងទ័ពជើងទឹករបស់ប្រទេសប៉ូឡូញ ដែលនៅតែកំពុងត្រូវបានពង្រឹងនៅចំពោះមុខជម្លោះ តាមព្រំដែននៅអ៊ុយក្រែន។ លោកបានបញ្ជាក់ថា ការធានាសុវត្ថិភាពសមុទ្របាល់ទិក នៅតែជាកត្តាដ៏សំខាន់នៃយុទ្ធសាស្ត្ររបស់ប្រទេសប៉ូឡូញ៕