អង្គការសហប្រជាជាតិ(UN)បានព្រមានថា មនុស្សរាប់លាននាក់បន្ថែមទៀត ប្រឈមនឹងភាពអត់ឃ្លាន បើសិនជាសង្រ្គាមសហរដ្ឋអាមេរិក-អ៊ីស្រាអែលលើអ៊ីរ៉ង់ ហើយវាយប្រហារសងសឹករបស់អ៊ីរ៉ង បន្តរហូតដល់ខែមិថុនា ។

លោក Carl Skau គឺជាអនុប្រធានប្រតិបត្តិកម្មវិធីល្បៀងអាហារពិភពលោករបស់ UN និយាយនៅថ្ងៃអង្គារនេះថា បើសិនជាជម្លោះមជ្ឈិមបូព៌ា បន្តរហូតដល់ខែមិថុនា មនុស្ស ៤៥លាននាក់បន្ថែមទៀត អាចនឹងធ្លាក់ក្នុងភាពអត់ឃ្លានធ្ងន់ធ្ងរ ដោយសារការកើនឡើងតម្លៃ ។

លោកថា វានឹងធ្វើឲ្យកម្រិតភាពអត់ឃ្លានជាប់កំណត់ត្រា ហើយវាគឺជាទស្សនីយភាពដ៏អាក្រក់បំផុតមួយ ហើយបច្ចុប្បន្ន មនុស្ស ៣១៩លាននាក់ បានជួបអសន្តិសុខស្បៀងធ្ងន់ធ្ងររួចទៅហើយ ។

ការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់ដែលបានចាប់ផ្តើមកាលពីថ្ងៃទី ២៨ ខែកុម្ភៈ បានកាត់ផ្តាច់ផ្លូវជំនួយមនុស្សធម៌ដ៏សំខាន់ ពន្យាពេលការដឹកជញ្ជូនសង្រ្គោះអាយុជីវិតមនុស្ស ដល់វិបត្តិធ្ងន់ធ្ងរបំផុតមួយចំនួនរបស់ពិភពលោក ។

លោក Skau និយាយទៀតថា ថ្លៃដឹកជញ្ជូនកើនឡើងចំនួន ១៨ភាគរយ ចាប់តាំងពីសង្រ្គាមចាប់ផ្តើម ហើយការដឹកជញ្ជូនមួយចំនួន បានផ្លាស់ប្តូរផ្លូវធ្វើដំណើរ ។

ខណៈពេលនោះដែរ មនុស្សជាង ២១លាននាក់នៅស៊ូដង់ ដែលស្មើជិតពាក់កណ្តាលនៃពលរដ្ឋរបស់ពួកគេ ប្រឈមនឹងភាពអត់ឃ្លានធ្ងន់ធ្ងរ ។ គ្រោះទុរ្ភិក្សត្រូវបានបញ្ជាក់នៅតាមតំបន់មួយចំនួន ជាទីដែលការប្រយុទ្ធគ្នារាប់ខែបានធ្វើឲ្យក្រុមជំនួយមិនអាចនាំយកស្បៀងចូលទៅបាន ៕