ប្រធានាធិបតីអាមេរិកលោក Donald Trump បាននិយាយកាលពីថ្ងៃអង្គារ ១៧មីនា សប្ដាហ៍នេះថា លោករំពឹងថានឹងធ្វើដំណើរទៅកាន់ប្រទេសចិនក្នុងរយៈពេលជាងមួយខែទៀត បន្ទាប់ពីបានពន្យារពេលដំណើរបំពេញទស្សនកិច្ចដែលបានគ្រោងធ្វើនៅចុងខែមីនានេះ ដោយសារតែសង្គ្រាមរបស់លោកលើអ៊ីរ៉ង់។

លោក Trump បានប្រាប់ក្រុមអ្នកសារព័ត៌មាននៅសេតវិមានថា ពួកលោកមានទំនាក់ទំនងការងារល្អណាស់ជាមួយប្រទេសចិន ដូច្នេះពួកលោកនឹងទៅដល់ទីនោះក្នុងរយៈពេលប្រហែល៥ ឬ៦ សប្តាហ៍ទៀត។

លោក Trump បានព្យាយាមនិយាយសម្រាលពីមូលហេតុនៃការពន្យារពេល ហើយបាននិយាយថា លោកមានទំនាក់ទំនងរឹងមាំជាមួយប្រធានាធិបតីចិន លោក Xi Jinping។

លោកក៏កំពុងទន្ទឹងរង់ចាំជួបប្រធានាធិបតី Xi ដែរ។លោកគិតថា លោក Xi ក៏ទន្ទឹងរង់ចាំជួបរូបលោកដូចគ្នាដែរ។

លោក Trump បាននិយាយថា ប្រទេសចិន បានក្លាយជាប្រភពសេដ្ឋកិច្ចសម្រាប់ពួកលោក ។ប្រទេសចិនល្អណាស់ ក្នុងអ្វីដែលលោកហៅថាជាការផ្លាស់ប្តូរសម្រាប់សហរដ្ឋអាមេរិក។

លោក Trump បានសាទរម្តងហើយម្តងទៀតចំពោះការចរចាពាណិជ្ជកម្មរបស់លោកជាមួយប្រទេសចិន ដោយនិយាយថា ទំនាក់ទំនងកាន់តែប្រសើរអាចផ្តល់អត្ថប្រយោជន៍ដល់សហរដ្ឋអាមេរិក៕