យោងតាមការប៉ាន់ស្មានថ្មីរបស់អង្គការសហប្រជាជាតិ ដែលចេញផ្សាយនៅថ្ងៃពុធ (១៨ មីនា) នេះ បានបង្ហាញថា កុមារប្រហែល ៤,៩លាននាក់ នៅទូទាំងពិភពលោក បានស្លាប់មុនពេលឈានដល់ខួបកំណើតគម្រប់ ៥ឆ្នាំរបស់ពួកគេ កាលពីឆ្នាំ២០២៤កន្លងទៅ ដែលនេះជាសញ្ញាបង្ហាញថា វឌ្ឍនភាពក្នុងការកាត់បន្ថយអត្រាមរណភាពកុមារបានជាប់គាំង សូម្បីតែមុនពេលមានការកាត់បន្ថយកញ្ចប់ថវិកាជំនួយសកលកាលពីឆ្នាំ២០២៥ទៅទៀត។

អង្គការកុមារ យូនីសេហ្វ (UNICEF) ធនាគារពិភពលោក អង្គការសុខភាពពិភពលោក (WHO) និងអង្គភាពចំនួនប្រជាជនសរុបនៃអង្គការសហប្រជាជាតិ ដែលជាអ្នករៀបចំរបាយការណ៍នេះ បានលើកឡើងថា មរណភាពភាគច្រើនអាចបង្ការបាន ប្រសិនបើមានលទ្ធភាពទទួលបានសេវាថែទាំសុខភាពកាន់តែប្រសើរ និងអន្តរាគមន៍ក្នុងតម្លៃទាបចំពោះបញ្ហាប្រឈមនានា ដូចជាផលវិបាកនៃការសម្រាលកូនមិនគ្រប់ខែ ឬជំងឺដូចជាគ្រុនចាញ់ជាដើម។

ទីភ្នាក់ងារទាំងនោះបានឱ្យដឹងថា មរណភាពកុមារដែលអាចបង្ការបាន បានថយចុះជាងពាក់កណ្តាលចាប់តាំងពីឆ្នាំ២០០០ ប៉ុន្តែវឌ្ឍនភាពនេះបានយឺតយ៉ាវចាប់តាំងពីឆ្នាំ២០១៥ មក។ ក្នុងឆ្នាំ២០២២ តួលេខនេះគឺ ៤,៩ លាននាក់ ដែលកាលនោះជាកម្រិតទាបបំផុតជាប្រវត្តិសាស្ត្រ ហើយក្នុងឆ្នាំ២០២៣ តួលេខនេះគឺ ៤,៨ លាននាក់។ ទោះបីជាតួលេខឆ្នាំ២០២៤ ហាក់ដូចជាបង្ហាញពីការកើនឡើងវិញក៏ដោយ ក៏ទីភ្នាក់ងារនានាបានបញ្ជាក់ថា ទិន្នន័យត្រូវបានគណនាតាមរបៀបខុសៗគ្នាសម្រាប់ឆ្នាំទាំងពីរ ដូច្នេះមិនអាចយកមកប្រៀបធៀបគ្នាដោយផ្ទាល់បានទេ។

អ្នកនាំពាក្យមួយរូបរបស់អង្គការសុខភាពពិភពលោក WHO បានបន្ថែមថា៖ «ពិភពលោកពិតជាឃើញមានការថយចុះល្បឿនជាសកល ក្នុងការកាត់បន្ថយអត្រាមរណភាព» ដោយព្រមានថា ជម្លោះ អស្ថិរភាពសេដ្ឋកិច្ច បញ្ហាបម្រែបម្រួលអាកាសធាតុ និងប្រព័ន្ធសុខាភិបាលដែលទន់ខ្សោយ សុទ្ធតែជាកត្តារួមចំណែកធ្វើឱ្យវឌ្ឍនភាពជាប់គាំង ខណៈការកាត់បន្ថយជំនួយនឹងកាន់តែបន្ថែមបន្ទុកថែមទៀត។

គួរឱ្យដឹងថា តួលេខដែលចេញផ្សាយនៅថ្ងៃពុធនេះ គ្របដណ្តប់លើឆ្នាំ២០២៤ ពោលគឺមុនពេលដែលសហរដ្ឋអាមេរិក រួមទាំងម្ចាស់ជំនួយធំៗផ្សេងទៀតដូចជា ចក្រភពអង់គ្លេស និងអាល្លឺម៉ង់ បានចាប់ផ្តើមកាត់បន្ថយកញ្ចប់ថវិកាជំនួយអន្តរជាតិរបស់ពួកគេ៕