ក្រសួងការពារជាតិរុស្ស៊ីបាននិយាយថា ប្រព័ន្ធការពារដែនអាកាសរបស់រុស្ស៊ីបានស្ទាក់ចាប់យានដ្រូន អ៊ុយក្រែនចំនួន២០៦គ្រឿងលើទឹកដីរុស្ស៊ីកាលពីយប់ថ្ងៃ១៧មីនា សប្ដាហ៍នេះ រួមទាំង៤០ គ្រឿង ដែលកំពុងហោះឆ្ពោះទៅកាន់ទីក្រុងមូស្គូ។   

ក្រុមអាជ្ញាធររុស្ស៊ីបានរាយការណ៍ពីការវាយប្រហារដោយយានដ្រូន លើរដ្ឋធានីសម្រាប់ថ្ងៃទី៤ជាប់ៗគ្នា។ អ៊ុយក្រែនពុំបានធ្វើអត្ថាធិប្បាយលើការវាយប្រហារថ្មីៗនេះទេ។

មន្ត្រីសន្តិសុខជាន់ខ្ពស់រុស្ស៊ីមួយរូបព្រមានកាលពីថ្ងៃអង្គារថា ល្បឿន និងការអភិវឌ្ឍនៃការផលិតយានដ្រូនរបស់អ៊ុយក្រែនមានន័យថា គ្មានតំបន់រុស្ស៊ីណាមួយមានសុវត្ថិភាពពីការវាយប្រហារនោះទេ។

លោក Sergei Shoigu រដ្ឋលេខាធិការក្រុមប្រឹក្សាសន្តិសុខដ៏មានឥទ្ធិពលរបស់រុស្ស៊ី និងជាអតីតរដ្ឋមន្ត្រីក្រសួងការពារជាតិរុស្ស៊ី បានប្រាប់កិច្ចប្រជុំមន្ត្រីនៅក្នុងទីក្រុង Yekaterinburg របស់តំបន់ Urals ថា ចំនួននៃការវាយប្រហារបំផ្លិចបំផ្លាញរបស់អ៊ុយក្រែនប្រឆាំងនឹងរុស្ស៊ីបានកើនឡើង៤០% ក្នុងឆ្នាំ ២០២៥ ដល់១.៨៣០ករណី។

ចំណែកលោក Sergey Sobyanin អភិបាលក្រុងមូស្គូបាននិយាយថា យានដ្រូនរបស់អ៊ុយក្រែនជាច្រើនត្រូវបានស្ទាក់ចាប់ ចាប់ពីម៉ោងប្រហែល១០ យប់ម៉ោងក្នុងស្រុក រហូតដល់ព្រឹកព្រលឹម។ គិតត្រឹមម៉ោង ៦:១៥នាទីព្រឹកម៉ោងនៅទីក្រុងមូស្គូ យានដ្រូន៣៩គ្រឿងត្រូវបានបាញ់ទម្លាក់។

សារព័ត៌មាន Kyiv Independent មិនអាចផ្ទៀងផ្ទាត់របាយការណ៍នៅពេលចេញផ្សាយនោះបានទេ។

ហ្វូងយានដ្រូនចុងក្រោយបំផុតនៅលើរដ្ឋធានីរបស់រុស្ស៊ីបានកើតឡើងស្របពេលមានការកើនឡើងនៃការវាយប្រហារលើទីក្រុងមូស្គូក្នុងរយៈពេលប៉ុន្មានថ្ងៃថ្មីៗនេះ។ លោក Sobyanin បានអះអាងកាលពីថ្ងៃ១៦មីនាថា យានដ្រូនជាង២៥០ គ្រឿង ដែលមិនរាប់បញ្ចូលចំនួនសរុបចុងក្រោយបំផុត ត្រូវបានបាញ់ទម្លាក់នៅលើអាកាសលើទីក្រុងមូស្គូចាប់តាំងពីថ្ងៃទី១៤ ខែមីនាមក៕