ប្រទេសគុយបា បានប្រញាប់ប្រញាល់ស្តារថាមពលឡើងវិញ បន្ទាប់ពីមានការផ្តាច់ចរន្តអគ្គិសនីនៅទូទាំងប្រទេស ដែលបានវាយប្រហារប្រទេសកោះគ្រប់គ្រងដោយកុម្មុយនិស្តមួយនេះ ខណៈប្រធានាធិបតីសហរដ្ឋអាមេរិក លោក Donald Trump បានប្រកាសថា លោកនឹង «យកមកគ្រប់គ្រង»។ រដ្ឋាភិបាល មិនបានបញ្ជាក់ច្បាស់ថាអ្វីជាមូលហេតុនៃការដាច់ចរន្តអគ្គិសនីញឹកញាប់ចុងក្រោយបំផុតរបស់ប្រទេសគុយបានោះទេ ប៉ុន្តែបាននិយាយថា គិតត្រឹមថ្ងៃអង្គារម្សិលមិញ ពីរភាគបីនៅក្នុងប្រទេសមានអគ្គិសនីប្រើប្រាស់ឡើងវិញ។

បន្ថែមលើការព្រួយបារម្ភមួយផ្សេងទៀត ការរញ្ជួយដីកម្រិត ៥,៨ រ៉ិចទ័របានវាយប្រហារនៅឆ្នេរសមុទ្រប្រទេសគុយបាកាលពីព្រឹកថ្ងៃអង្គារ ប៉ុន្តែពុំមានរបាយការណ៍ភ្លាមៗអំពីអ្នកស្លាប់ និងរងរបួស ឬការខូចខាត នោះទេ។

បន្ទាប់ពីរយៈពេលជិត៧ទសវត្សរ៍ក្នុងការប្រឆាំងនឹងសហរដ្ឋអាមេរិក អាជ្ញាធរកុម្មុយនិស្តរបស់ទីក្រុងឡាហាវ៉ាន កំពុងស្ថិតនៅក្រោមសម្ពាធយ៉ាងខ្លាំងពីរដ្ឋបាលលោក Trump ដែលប្តេជ្ញាបង្កើតប្រវត្តិសាស្ត្រ។

វាគឺជាការគំរាមកំហែងដ៏ច្បាស់លាស់បំផុតមួយរបស់លោក Trump ប្រឆាំងនឹងប្រទេសកោះមួយនេះ ដែលមានចម្ងាយត្រឹមតែ១៥០គីឡូម៉ែត្រពីឆ្នេរសមុទ្ររដ្ឋ Florida។ មានការព្រួយបារម្ភកាន់តែច្រើន ពីការទទួលបានអគ្គិសនីត្រឡប់មកវិញនៅក្នុងទីក្រុងឡាហាវ៉ាន ជាទីក្រុងដែលប្រជាជនរស់នៅ ១,៧ លាននាក់។ អ្នកចូលនិវត្តន៍អាយុ៦៤ឆ្នាំម្នាក់ បាននិយាយថា«អ្វីដែលយើងខ្លាចគ្រប់ពេលនោះ គឺ ការដាច់ចរន្តអគ្គិសនីដែលនឹងអូសបន្លាយពេល ហើយយើងនឹងបាត់បង់អ្វីៗដែលយើងមាននៅក្នុងទូរទឹកកក ព្រោះអ្វីៗទាំងអស់មានតម្លៃថ្លៃ»។ ប្រព័ន្ធផលិតអគ្គិសនីមានអាយុកាលចាស់ៗនៅប្រទេសគុយបា កំពុងស្ថិតក្នុងស្ថានភាពច្របូកច្របល់ ដោយមានការដាច់ចរន្តអគ្គិសនីរាល់ថ្ងៃរហូតដល់២០ម៉ោង។