ប្រទេសអាហ្សង់ទីន បានបញ្ចប់កិច្ចព្រមព្រៀងចុងក្រោយក្នុងការសម្រេចចិត្តដកខ្លួនចេញពីអង្គការសុខភាពពិភពលោក (WHO) ដោយដើរតាមគន្លងរបស់សហរដ្ឋអាមេរិក និងកាត់ផ្តាច់ទំនាក់ទំនងជាមួយស្ថាប័នសុខភាពពិភពលោកជាផ្លូវការ។

កាលពីថ្ងៃអង្គារ រដ្ឋមន្ត្រីក្រសួងការបរទេស លោក Pablo Quirno បានបញ្ជាក់ពីការដកខ្លួនរបស់ប្រទេសអាហ្សង់ទីន ចេញពីទីភ្នាក់ងារអន្តរជាតិ ដែលតាមដាននិន្នាការសុខភាព តាមដានជំងឺ ជំរុញការទទួលបានសេវាថែទាំសុខភាព និងបណ្តុះបណ្តាលអ្នកផ្តល់សេវាវេជ្ជសាស្ត្រ។ ចំណាត់ការនេះ ត្រូវបានប្រកាសជាលើកដំបូងកាលពីក្នុងខែកុម្ភៈ ឆ្នាំមុន ហើយមួយខែក្រោយមក លោកQuirno បានពន្យល់ថា រដ្ឋាភិបាលរបស់ប្រធានាធិបតីស្តាំនិយម លោក Javier Milei បានចេញសេចក្តីជូនដំណឹងជាផ្លូវការទៅដល់អង្គការសុខភាពពិភពលោក(WHO)។

លោក Quirno បានសរសេរនៅក្នុងសារលើបណ្តាញផ្សព្វផ្សាយសង្គមរបស់លោកកាលពីថ្ងៃអង្គារថា «ថ្ងៃនេះ ការដកខ្លួនរបស់ប្រទេសអាហ្សង់ទីន ចេញពីអង្គការសុខភាពពិភពលោក (WHO) ចូលជាធរមាន ដែលមានរយៈពេលមួយឆ្នាំចាប់តាំងពីការជូនដំណឹងជាផ្លូវការត្រូវបានធ្វើឡើងដោយប្រទេសរបស់យើង»។

ប្រទេសអាហ្សង់ទីន នឹងបន្តជំរុញកិច្ចសហប្រតិបត្តិការអន្តរជាតិក្នុងវិស័យសុខាភិបាល តាមរយៈកិច្ចព្រមព្រៀងទ្វេភាគី និងវេទិកាតំបន់ ខណៈរក្សាបានយ៉ាងពេញលេញនូវអធិបតេយ្យភាព និងសមត្ថភាពរបស់ខ្លួនក្នុងការធ្វើការសម្រេចចិត្តទាក់ទងនឹងគោលនយោបាយសុខភាព»។ ការសម្រេចចិត្តរបស់លោក Milei ក្នុងការដកប្រទេសអាហ្សង់ទីនចេញពីអង្គការសុខភាពពិភពលោក (WHO) គឺស្របនឹងការសម្រេចចិត្តស្រដៀងគ្នានេះ ដែលបានធ្វើឡើងក្រោមការដឹកនាំរបស់លោកប្រធានាធិបតីសហរដ្ឋអាមេរិក ដូណាល់ ត្រាំ។ មេដឹកនាំទាំងពីរ បានរិះគន់អង្គការអន្តរជាតិមួយនេះដោយចោទប្រកាន់ថា បានជំរុញគោលនយោបាយជឿនលឿនក្នុងវិស័យនានាដូចជាសុខភាព និងវេជ្ជសាស្ត្រ។