សហគមន៍នានានៅក្នុងស្រុក Aceh Tamiang របស់ប្រទេសឥណ្ឌូនេស៊ី កំពុងទប់ទល់ដើម្បីស្តារឡើងវិញពីទឹកជំនន់ដ៏គំហុកធ្ងន់ធ្ងរ ខណៈខែពិសិដ្ឋនៃពិធីបុណ្យរ៉ម៉ាឌន របស់ពលរដ្ឋមូស្លីម ជិតឈានដល់ទីបញ្ចប់ ដោយពលរដ្ឋនិយាយថា តម្លៃប្រេងឥន្ធនៈកើនឡើងទាក់ទងនឹងជម្លោះសកល បានធ្វើឱ្យការលំបាករបស់ពួកគេកាន់តែធ្ងន់ធ្ងរ។ វីដេអូថតដោយយានដ្រូន បង្ហាញពីស្ពានដែលត្រូវបានបំផ្លាញ សង្កាត់នានាលិចទឹក និងលំនៅឋានបណ្តោះអាសន្នថ្មីកំពុងត្រូវបានសាងសង់តាមបណ្តោយទន្លេ ជាកន្លែងដែលគ្រួសារជាច្រើននៅតែរស់នៅក្នុងតង់ដោយពឹងផ្អែកលើផ្ទះបាយរួម ខណៈពួកគេកំពុងរង់ចាំទីជម្រកអចិន្ត្រៃយ៍។

សម្រាប់ប្រជាជនជាច្រើន ក្នុងពិធីបុណ្យ Eid al-Fitr នៅឆ្នាំនេះ មានអារម្មណ៍ខុសគ្នាយ៉ាងខ្លាំងពីការប្រារព្ធពិធីបុណ្យមុនៗ។ នាង Salsa Nafisa អាយុ២៧ឆ្នាំ ជាស្ត្រីមេផ្ទះដែលបានសម្រាលកូនមួយថ្ងៃបន្ទាប់ពីទឹកជំនន់ បាននិយាយថា បរិយាកាសកាលពីឆ្នាំមុនៗ គឺខុសគ្នាទាំងស្រុង។ «យើងធ្លាប់អបអរពិធីបុណ្យ ពី ២ទៅ៦ថ្ងៃមុនពិធីបុណ្យ Eid ប៉ុន្តែពេលនេះ យើងមិនបានគិតថា ថ្ងៃឈប់សម្រាកនោះនឹងខិតជិតមកដល់ទេ»។

នាង Nafisa បាននិយាយថា ភាពតានតឹងសកលបានរួមចំណែកដល់ភាពតានតឹងផ្នែកសេដ្ឋកិច្ចក្នុងស្រុក។ សង្គ្រាមនៅអ៊ីរ៉ង់ បានជះឥទ្ធិពលយ៉ាងខ្លាំង។ យើងមានអារម្មណ៍បែបនេះរួចទៅហើយ ជាពិសេសនៅពេលតម្រង់ជួរទិញប្រេងឥន្ធនៈក្រោមកម្តៅថ្ងៃ។ អ្នកស្រុកម្នាក់ទៀត បាននិយាយថា ក្រុមគ្រួសាររបស់គាត់កំពុងកាត់បន្ថយការចំណាយ ខណៈកំពុងរស់នៅក្នុងទីជម្រកបណ្តោះអាសន្ន។ នាងបាននិយាយថា «តម្លៃប្រេងឥន្ធនៈបានឡើងដល់ ៥០.០០០រូពីក្នុងមួយលីត្រ ដែលខ្ពស់ជាងធម្មតាឆ្ងាយខ្លាំង»។ ដោយសារគ្រួសារជាច្រើននៅតែត្រូវបានជម្លៀស ហើយការងារសាងសង់ឡើងវិញកំពុងដំណើរការ ខេត្ត Aceh Tamiang ប្រឈមនឹងការងើបឡើងវិញយូរអង្វែង ខណៈសហគមន៍មូស្លីមកំពុងរៀបចំសម្រាប់ការប្រារព្ធពិធីបុណ្យ Eid។