នាយករដ្ឋមន្ត្រីប្រទេសអូស្ត្រាលី លោក Anthony Albanese បាននិយាយនៅថ្ងៃពុធ ទី១៨ ខែមីនា ថា លោកនឹងបើកកិច្ចប្រជុំជាមួយមេដឹកនាំរដ្ឋនិងដែនដី ខណៈរដ្ឋាភិបាលកំពុងទប់ទល់ចំពោះកង្វះប្រេងឥន្ធនៈនៅក្នុងតំបន់ជនបទប្រទេសអូស្ត្រាលី ដែលបង្កការរំខានដល់ការផ្គត់ផ្គង់ជាសកល ដោយសារតែសង្គ្រាមនៅអ៊ីរ៉ង់។

គណៈរដ្ឋមន្ត្រីជាតិនឹងកោះប្រជុំតាមអនឡាញនៅថ្ងៃព្រហស្បតិ៍ ទី១៩ ខែមីនា ដើម្បីពង្រឹងការសម្របសម្រួលរវាងរដ្ឋាភិបាលសហព័ន្ធ និងរដ្ឋ ដោយផ្តោតសំខាន់លើការគាំទ្រសហគមន៍ដែលរងផលប៉ះពាល់ ជាពិសេសនៅក្រុងតំបន់ជនបទ។ កាលពីសប្តាហ៍មុន ប្រទេសអូស្ត្រាលី បានប្រកាសថា ខ្លួននឹងបញ្ចេញប្រេងសាំង និងប្រេងម៉ាស៊ូត ពីប្រេងបម្រុងក្នុងស្រុករបស់ខ្លួន ក្នុងកិច្ចខិតខំប្រឹងប្រែងដើម្បីរក្សាស្ថិរភាពខ្សែច្រវ៉ាក់ផ្គត់ផ្គង់ និងបន្ធូរបន្ថយការខ្វះខាតនៅទូទាំងមជ្ឈមណ្ឌលប្រចាំតំបន់។

ជម្លោះនៅតំបន់មជ្ឈិមបូព៌ា បានជំរុញឱ្យតម្លៃប្រេងកើនឡើង និងបង្កើនការព្រួយបារម្ភជុំវិញការផ្គត់ផ្គង់ បន្ទាប់ពីការវាយប្រហារលើរោងចក្រថាមពលនៅឈូងសមុទ្រ។ ច្រកសមុទ្រ Hormuz ដែលជាចំណុចដឹកជញ្ជូនថាមពលដ៏សំខាន់បំផុតមួយរបស់ពិភពលោក ភាគច្រើននៅតែត្រូវបានបិទ។

លោក Albanese បានបញ្ជាក់ថា គ្រាប់ផ្លោងរបស់អ៊ីរ៉ង់មួយគ្រាប់បានធ្លាក់នៅជិតមូលដ្ឋានទ័ពអាកាស Al Minhad របស់ខ្លួននៅប្រទេសអារ៉ាប់រួមនៅថ្ងៃពុធនេះ និងបាននិយាយបន្ថែមថា បុគ្គលិកការពារជាតិអូស្ត្រាលីទាំងអស់មានសុវត្ថិភាព។ លោក Albanese បានប្រាប់អ្នកសារព័ត៌មាននៅរដ្ឋ Tasmania ថា «មានការខូចខាតតិចតួចចំពោះអគារស្នាក់នៅ និងមណ្ឌលសុខភាព ដោយសារតែអគ្គិភ័យដែលបានកើតឡើងបណ្តាលមកពីគ្រាប់ផ្លោងធ្លាក់លើផ្លូវមួយកន្លែងទៅកាន់មូលដ្ឋាននោះ»។