តុលាការធម្មនុញ្ញថៃ បានបញ្ជាក់នៅថ្ងៃពុធ (១៨ មីនា) នេះថា ខ្លួនបានយល់ព្រមទទួលយកមកពិចារណានូវញត្តិមួយ ដែលបានប្តឹងតវ៉ាប្រឆាំងនឹងភាពស្របច្បាប់នៃសន្លឹកឆ្នោតដែលបានប្រើប្រាស់ក្នុងការបោះឆ្នោតសកលកាលពីខែមុន។

តុលាការបាននិយាយក្នុងសេចក្តីថ្លែងការណ៍មួយថា គណៈកម្មការរៀបចំការបោះឆ្នោតត្រូវបានផ្តល់ពេលវេលាចំនួន ១៥ថ្ងៃដើម្បីផ្តល់ការបំភ្លឺ។ តុលាការមិនបានបញ្ជាក់ពីដីកាបង្គាប់ផ្សេងទៀតទេ ដែលមានន័យថា ការបោះឆ្នោតនៅក្នុងសភាដែលបានគ្រោងទុកនៅថ្ងៃព្រហស្បតិ៍ ទី១៩ ខែមីនា ស្អែកនេះ ដើម្បីជ្រើសតាំងនាយករដ្ឋមន្ត្រីថ្មីជាផ្លូវការ នឹងនៅតែបន្តទៅមុខ។

ការិយាល័យទទួលពាក្យបណ្ដឹងពលរដ្ឋ ដែលជាអ្នកដាក់ញត្តិនេះ បានឱ្យដឹងថា មានបណ្តឹងតវ៉ាពីសាធារណជនចំនួន ២១ករណី បានចោទប្រកាន់ថា បាកូដ និង QR កូដ នៅលើសន្លឹកឆ្នោត អាចត្រូវបានយកទៅប្រើប្រាស់ដើម្បីកំណត់អត្តសញ្ញាណថា តើអ្នកបោះឆ្នោតបានជ្រើសរើសបេក្ខជនរូបណា ឬគណបក្សមួយណា ដែលទង្វើនេះធ្វើឱ្យប៉ះពាល់ដល់ការរក្សាការសម្ងាត់នៃការបោះឆ្នោត។

គណបក្ស ភូមិចៃថៃ របស់នាយករដ្ឋមន្ត្រីចាំផ្ទះ លោក Anutin Charnvirakul ទទួលបានជ័យជម្នះនៅក្នុងការបោះឆ្នោតកាលពីថ្ងៃទី៨ ខែកុម្ភៈ។ គួររម្លឹកថា តុលាការថៃ ធ្លាប់បានសម្រេចទុកជាមោឃៈនូវការបោះឆ្នោតឆ្នាំ២០០៦ ម្តងរួចមកហើយ ដោយសារមូលហេតុថា ដំណើរការបោះឆ្នោតមិនត្រូវបានធ្វើឡើងជាសម្ងាត់។

គណៈកម្មាធិការរៀបចំការបោះឆ្នោតរបស់ថៃ បានបញ្ជាក់ថា បាកូដទាំងនោះត្រូវបានដាក់បញ្ចូលក្នុងគោលបំណងពង្រឹងសន្តិសុខ ហើយការកំណត់អត្តសញ្ញាណរបស់អ្នកបោះឆ្នោត តម្រូវឱ្យមានការពិនិត្យមើលផ្នែកខាងលើនៃសន្លឹកឆ្នោត ដែលត្រូវបានរក្សាទុកយ៉ាងមានសុវត្ថិភាពបំផុត៕