ភ្នំពេញ ៖ ក្នុងជំនួបពិភាក្សាការងារ នៅទីស្តីការក្រុមប្រឹក្សាអភិវឌ្ឍន៍ នាថ្ងៃទី២៨ ខែមីនា ឆ្នាំ២០២២ រវាងលោកជំទាវ បណ្ឌិត អ៊ីម ចុងហ៊ី អនុប្រធានទីភ្នាក់ងារសហប្រតិបត្តិការអន្តរជាតិកូរ៉េ ជាមួយឯកឧត្តម ឈៀង យ៉ាណារ៉ា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការគណៈកម្មាធិការនីតិសម្បទានិងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា (គ.ជ.នា/ក.អ.ក) គឺកយកា-KOICA នឹងបន្តជួយដល់កម្ពុជា ដើម្បីឲ្យសម្រេចបាននូវគោលដៅអភិវឌ្ឍន៍របស់រដ្ឋាភិបាលកម្ពុជា។

​ក្នុងកិច្ចប្រជុំបានផ្តោតសំខាន់ទៅលើ កិច្ចសហប្រតិបត្តិការអភិវឌ្ឍន៍ជារួមជាមួយកម្ពុជា ការបង្ហាញអំពីគម្រោងគាំទ្ររបស់កយកា-KOICA សម្រាប់ប្រទេសកម្ពុជា ផែនការប្រចាំប្រទេសរបស់កយកាKOICA សម្រាប់ប្រទេសកម្ពុជា KOICA Cambodia Country Plan (CP) គម្រោងថ្មីសម្រាប់ឆ្នាំ២០២២ គម្រោងត្រៀមសម្រាប់ឆ្នាំ២០២៣ និងវឌ្ឍនភាពបច្ចុប្បន្ននៃការស្នើសុំគម្រោងថ្មីសម្រាប់ឆ្នាំ២០២៤ ការពិនិត្យទៅលើវឌ្ឍនភាពនៃកិច្ចសហប្រតិបត្តិការនិងការកំណត់អាទិភាពសម្រាប់កិច្ចសហប្រតិបត្តិការនាពេលអនាគត។

ក្នុងឱកាសនោះ លោកជំទាវ បណ្ឌិត អ៊ីម ចុងហ៊ី បានមានប្រសាសន៍ថា ប្រទេសកម្ពុជា គឺជាប្រទេសឈានមុខគេក្នុងវិស័យវប្បធម៌អាស៊ីអាគ្នេយ៍ ហើយមានការរីកចម្រើនគួរឲ្យកត់សម្គាល់ ជាមួយនឹងសក្ដានុពលនៃការអភិវឌ្ឍន៍យ៉ាងខ្លាំង។ ជាពិសេស កម្ពុជាបានប្រយុទ្ធប្រឆាំង នឹងជំងឺរាតត្បាតកូវីដ-១៩ បានយ៉ាងល្អក្នុងរយៈពេល២ឆ្នាំមកនេះ។ លោកជំទាវ បណ្ឌិត មានការចាប់អារម្មណ៍យ៉ាងខ្លាំងចំពោះការខិតខំប្រឹងប្រែងរបស់រដ្ឋាភិបាលក្នុងការរក្សា គ្រប់គ្រងការរាតត្បាតនៃជំងឺកូវីដ-១៩ ហើយក៏សូមថ្លែងអំណរ   អរគុណយ៉ាងស្មោះស្ម័គ្រចំពោះការបើកដំណើរការិយាល័យ កយកា ប្រចាំនៅប្រទេសកម្ពុជាប្រកបដោយសុវត្ថិភាព។

លោកជំទាវ បណ្ឌិត អ៊ីម ចុងហ៊ី ក៏បានលើកឡើងទៀតថា ប្រទេសកម្ពុជា គឺជាប្រទេសដៃគូដ៏សំខាន់របស់កូរ៉េ ដែលជាប់ចំណាត់ថ្នាក់កំពូលនៃការគាំទ្រការអភិវឌ្ឍន៍របស់កយកាKOICA និងជាប្រទេសដៃគូ ជំនួយអភិវឌ្ឍន៍ផ្លូវការ (ODA) ដ៏សំខាន់មួយ។ កយកា-KOICA នឹងបន្តជួយដល់កម្ពុជា ដើម្បីឲ្យសម្រេចបាននូវគោលដៅអភិវឌ្ឍន៍របស់រដ្ឋាភិបាលកម្ពុជា។ ក្នុងអំឡុងពេលនៃការរីករាលដាល នៃជំងឺកូវីដ-១៩ កយកា-KOICA បានធ្វើសកម្មភាពគាំទ្រចម្រុះជាការឆ្លើយតបនឹងជំងឺកូវីដ-១៩ តាមរយៈកិច្ចសហប្រតិបត្តិការជាបន្តបន្ទាប់ជាមួយគ្នាទៅវិញទៅមក ហើយ កយកា(KOICA) សង្ឃឹមថា នឹងពង្រឹងកិច្ចសហប្រតិបត្តិការនាពេលអនាគតដើម្បីអភិវឌ្ឍប្រទេសកម្ពុជា។

ជាការឆ្លើយតប ឯកឧត្តម ឈៀង យ៉ាណារ៉ាក៏បានវាយតម្លៃខ្ពស់ចំពោះសមិទ្ធិផលដែលសម្រេចបានដោយកយកា(KOICA) ហើយបានថ្លែងអំណរគុណចំពោះកយក(KOICA) និងប្រជាជន និងរដ្ឋាភិបាលនៃសាធារណរដ្ឋកូរ៉េ ដែលបានគាំទ្រយ៉ាងខ្ជាប់ខ្ជួនដល់ការអភិវឌ្ឍន៍សេដ្ឋកិច្ចសង្គមរបស់កម្ពុជា តាមរយៈការអនុវត្តគម្រោង និងកម្មវិធី ក៏ដូចជាការប្រយុទ្ឋប្រឆាំងនឹងជំងឺកូវីដ-១៩របស់ប្រទេសកម្ពុជា និងដើម្បីសម្រួលដល់ការស្តារសេដ្ឋកិច្ចកម្ពុជា។ ចាប់តាំងពីឆ្នាំ១៩៩១ ដល់ឆ្នាំ២០២១ កយកា-KOICA បានផ្តល់ជំនួយឥតសំណងប្រហែល ៣១០លានដុល្លារអាមេរិក ដល់ប្រទេសកម្ពុជា ជាទម្រង់នៃគម្រោងអភិវឌ្ឍន៍ កម្មវិធីបណ្តុះបណ្តាល ការប្រឹក្សា អ្នកស្ម័គ្រចិត្តជាដើម ហើយបានបង្កើនចំនួនជាបន្តបន្ទាប់ជារៀងរាល់ឆ្នាំ។ ដោយឡែក សម្រាប់ឆ្នាំ២០២២នេះវិញ ជំនួយឥតសំណងរបស់កយកា-KOICA សម្រាប់ប្រទេសកម្ពុជា មានចំនួនសរុប ៣០លានដុល្លារអាមេរិក រួមជាមួយនឹងគម្រោងភាពជាដៃគូប្រចាំប្រទេសចំនួន១៤ កម្មវិធីភាពជាដៃគូរវាងសាធារណៈ និងឯកជនចំនួន១៨ កម្មវិធីបណ្តុះបណ្តាល (CIAT) កម្មវិធីអ្នកស្ម័គ្រចិត្តកូរ៉េ ជាដើម៕អត្ថបទ ៖ រដ្ឋា