អ៊ុយក្រែន៖ កងកម្លាំងអ៊ុយក្រែនទំនងជាបានវាយដណ្ដើមយកទីក្រុង Trostyanets មកវិញនៅក្នុងភាគខាងកើតរបស់ប្រទេសអ៊ុយក្រែនពីកងទ័ពរុស្ស៊ី។ ក្រុមអ្នកសារព័ត៌មាន AP កាលពីថ្ងៃចន្ទមើលឃើញរថក្រោះជាច្រើនគ្រឿងរបស់កងទ័ពអ៊ុយក្រែន ត្រូវបានស្វាគមន៍ដោយក្រុមប្រជាពលរដ្ឋក្នុងស្រុក។
ពួកគេក៏បានមើលឃើញផងដែរពីរថក្រោះជាច្រើនគ្រឿង និងគ្រឿងយុទ្ធោបករណ៍ជាច្រើនទៀតរបស់រុស្ស៊ីត្រូវបានបំផ្លិចបំផ្លាញ និងរត់ចោលកេសគ្រាប់រំសេវជាច្រើនទៀត។ ប្រជាពលរដ្ឋបានប្រាប់សារព័ត៌មាន AP ថា ការវាយប្រយុទ្ធគ្នាដ៏ខ្លាំងក្លាបានបង្ខំឲ្យកងទ័ពរុស្ស៊ីដកថយ។ ស្ត្រីម្នាក់បាននិយាយថា រូបគាត់សប្បាយចិត្តណាស់ដែលឃើញកងទ័ពរុស្ស៊ីដកថយទៅវិញ។ ក្នុងពេលប៉ុន្មានថ្ងៃថ្មីៗនេះ កងទ័ពអ៊ុយក្រែនបានវាយរុញច្រានកងទ័ពរុស្ស៊ីឲ្យដកថយនៅតំបន់ជាច្រើនក្នុងប្រទេសអ៊ុយក្រែន។
មន្ត្រីការពារជាតិជាន់ខ្ពស់មួយរូបរបស់សហរដ្ឋអាមេរិក ដែលសុំមិនបញ្ចេញឈ្មោះបាននិយាយកាលពីថ្ងៃចន្ទថា កងកម្លាំងរុស្ស៊ីកំពុងវាយសម្រុករុលទៅមុខយឺតៗប៉ុណ្ណោះ។ មន្ត្រីខាងលើបញ្ជាក់ថា រុស្ស៊ីទំនងជាកាត់បន្ថយប្រតិបត្តិការលើដីជិតរដ្ឋធានីគីវ និងផ្ដោតលើតំបន់ Donbas ច្រើនជាង៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
