មន្ត្រីជាន់ខ្ពស់មួយរូបរបស់អេមីរ៉ាតអារ៉ាប់រួម បាននិយាយថា អារ៉ាប់រួមអាចចូលរួមក្នុងកិច្ចខិតខំប្រឹងប្រែងដឹកនាំដោយសហរដ្ឋអាមេរិក ដើម្បីការពារការដឹកជញ្ជូនឆ្លងកាត់ច្រកសមុទ្រហ័រមូស ដោយបន្ថែមថា ទោះបីជាមិនទាន់មានផែនការផ្លូវការណាមួយ ត្រូវបានព្រមព្រៀងគ្នាក៏ដោយ ហើយការពិភាក្សា កំពុងដំណើរការ។ នេះបើយោងតាមទីភ្នាក់ងារសារព័ត៌មានរ៉យទ័រ។

លោក Anwar Gargash ទីប្រឹក្សាការទូតរបស់ប្រធានាធិបតីអេមីរ៉ាតអារ៉ាប់រួម បានថ្លែងនៅក្នុងព្រឹត្តិការណ៍តាមអនឡាញមួយដែលរៀបចំដោយក្រុមប្រឹក្សាទំនាក់ទំនងការបរទេសអាមេរិកថា៖«យើងទាំងអស់គ្នា មានការទទួលខុសត្រូវក្នុងការធានាលំហូរពាណិជ្ជកម្ម និងលំហូរថាមពល»។

លោក Gargash ក៏បាននិយាយផងដែរថា នៅពេលដែលសង្គ្រាមរបស់សហរដ្ឋអាមេរិក និងអ៊ីស្រាអែលជាមួយអ៊ីរ៉ង់បញ្ចប់ ការរៀបចំមួយនឹងត្រូវបានទាមទារ ដើម្បីធានាថា អ៊ីរ៉ង់មិនអាចប្រើប្រាស់កម្មវិធីនុយក្លេអ៊ែរ មីស៊ីល ឬយានដ្រូនរបស់ខ្លួន «ដើម្បីគំរាមកំហែងតំបន់នេះ» ទេ។

ការព្រួយបារម្ភ បានកើនឡើងចំពោះសុវត្ថិភាពនៃការដឹកជញ្ជូនឆ្លងកាត់ច្រកសមុទ្រហ័រមូស ដែលអ៊ីរ៉ង់បានរារាំងយ៉ាងមានប្រសិទ្ធភាព ហើយខណៈដែលលោកប្រធានាធិបតីដូណាល់ ត្រាំ បានស្វែងរកការប្រមូលផ្តុំប្រទេសនានាឲ្យដាក់ពង្រាយនាវាចម្បាំង ដើម្បីអមដំណើរនាវាដឹកប្រេងឆ្លងកាត់ផ្លូវទឹកយុទ្ធសាស្ត្រមួយនេះ។ 

នាពេលថ្មីៗនេះ លោក Gargash បានប្រាប់សារព័ត៌មាន La Repubblica ថា ការបិទច្រកសមុទ្រហ័រមូស គឺបណ្តោះអាសន្ន ហើយផលវិបាកសម្រាប់ទីផ្សារថាមពល មានន័យថា អ៊ីរ៉ង់កាន់តែឯកោ។ លោកក៏បាននិយាយផងដែរថា បណ្តាប្រទេសឈូងសមុទ្រ កំពុងជឿជាក់កាន់តែខ្លាំងឡើងអំពីតម្រូវការ ក្នុងការរួមបញ្ចូលមិនត្រឹមតែកម្មវិធីនុយក្លេអ៊ែររបស់សាធារណរដ្ឋនេះទេ ប៉ុន្តែថែមទាំងផែនការមីស៊ីលរបស់ខ្លួន នៅក្នុងការចរចាជាមួយអ៊ីរ៉ង់ផងដែរ ព្រោះវា «បានក្លាយជាយន្តការនៃការឈ្លានពាន»៕