អាជ្ញាធរបាននិយាយថា ខ្មាន់កាំភ្លើងបានសម្លាប់មនុស្សយ៉ាងហោចណាស់ ១៥នាក់ កាលពីថ្ងៃអង្គារ ក្នុងអំឡុងពេលវាយប្រហារលើភូមិចំនួនពីរ នៅភាគពាយ័ព្យនៃប្រទេសនីហ្សេរីយ៉ា។

ភូមិ Falale និង Kadobe ដែលជាសហគមន៍ជិតខាងនៅក្នុងតំបន់ Jibia នៃរដ្ឋ Katsina ត្រូវបានវាយប្រហារ កាលពីរសៀលថ្ងៃអង្គារ។ នេះបើយោងតាមលោក Nasir Mu’azu ស្នងការទទួលបន្ទុកកិច្ចការ  ផ្ទៃក្នុងរបស់រដ្ឋនេះ។

លោក Mu’azu បាននិយាយថា កងកម្លាំងសន្តិសុខក្នុងតំបន់ ធ្លាប់បានសម្លាប់ខ្មាន់កាំភ្លើងបីនាក់ ក្នុងអំឡុងពេលបាញ់ប្រហារគ្នា នៅក្នុងតំបន់នោះ។ ជាការសងសឹក ក្រុមខ្មាន់កាំភ្លើង បានធ្វើការវាយប្រហារ កាលពីថ្ងៃអង្គារ ដែលបានសម្លាប់មនុស្សយ៉ាងហោចណាស់ ១៥នាក់។

លោកបាននិយាយនៅក្នុងសេចក្តីថ្លែងការណ៍មួយថា៖«ចាប់តាំងពីពេលនោះមក កងកម្លាំងសន្តិសុខ បានស្តារសណ្តាប់ធ្នាប់ឡើងវិញ និងធ្វើឲ្យស្ថានការណ៍មានស្ថិរភាព»។ «យើងសូមអំពាវនាវដល់ប្រជាពលរដ្ឋឲ្យរក្សាភាពស្ងប់ស្ងាត់ និងអនុញ្ញាតឲ្យកងកម្លាំងសន្តិសុខបញ្ចប់ការស៊ើបអង្កេតរបស់ពួកគេ»។

ពុំមានក្រុមណាមួយអះអាងទទួលខុសត្រូវចំពោះការវាយប្រហារនោះទេ។ ក្រុមប្រដាប់អាវុធ ដែលត្រូវបានគេស្គាល់ថា ជា «ក្រុមចោរប្លន់» តែងតែធ្វើការវាយឆ្មក់ និងចាប់ជំរិត ដើម្បីទាមទារប្រាក់លោះ នៅភាគពាយ័ព្យ ភាគខាងជើង និងកណ្តាលនៃប្រទេសនីហ្សេរីយ៉ា៕