រត់ប្រណាំង៖ ទិវារត់ប្រណាំងភ្នំពេញអន្តរជាតិពាក់កណ្ដាលម៉ារ៉ាតុង ដែលរៀបចំដោយគណៈកម្មាធិការជាតិអូឡាំពិកកម្ពុជា គាំទ្រដោយក្រសួងទេសចរណ៍នឹងត្រឡប់មកវិញនាខែមិថុនា ឆ្នាំ២០២២ ខាងមុខនេះ បន្ទាប់ពីខកខានរៀបចំ ២ឆ្នាំដោយសារជំងឺរាតត្បាតជាសកលកូវីដ-១៩។
ព្រឹត្តិការណ៍កីឡាទេសចរណ៍ដ៏ធំនៅរាជធានីភ្នំពេញបានរៀបចំរយៈពេល ៩ឆ្នាំមកហើយគិតត្រឹមឆ្នាំ២០១៩ មុនខកខានរៀបចំនៅឆ្នាំ២០២០ និងឆ្នាំ២០២១ បន្ទាប់ពីផ្ទុះជំងឺកូវីដ-១៩ រហូតមកទល់ពេលនេះ ទើបគណៈកម្មាធិការរៀបចំទិវារត់ប្រណាំងភ្នំពេញអន្ដរជាតិពាក់កណ្ដាលម៉ារ៉ាតុងនេះ ប្រកាសរៀបចំឡើងវិញដែលជាការរៀបចំលើកទី១០ និងគ្រោងរៀបចំនាថ្ងៃទី១៨ ខែមិថុនា ឆ្នាំ២០២២ នៅខាងមុខព្រះបរមរាជវាំង។ តាមរយៈការត្រឡប់មកវិញនៃព្រឹត្តិការណ៍ដ៏ធំប្រចាំឆ្នាំនេះ គណៈកម្មាធិការរៀបចំបានអំពាវនាវឲ្យកីឡាករ-កីឡាការិនីជាតិ និងអន្ដរជាតិ ក៏ដូចជាអ្នកឧបត្ថម្ភគាំទ្រនានារួសរាន់ចុះឈ្មោះចូលរួមឲ្យបានមុនថ្ងៃទី៣១ ខែមីនា ឆ្នាំ២០២២ នេះដើម្បីទទួលបានតម្លៃពិសេស។ ចំពោះវិញ្ញាសាប្រកួតគឺមាន ៣វិញ្ញាសា រួមមានវិញ្ញាសារត់ ២១គីឡូម៉ែត្រ, ១០គីឡូម៉ែត្រ និង ៣គីឡូម៉ែត្រ ។
សូមបញ្ជាក់ថា ទិវារត់ប្រណាំងភ្នំពេញអន្តរជាតិពាក់កណ្ដាលម៉ារ៉ាតុងនេះ រៀបចំឡើងក្នុងគោលបំណងអបអរសាទរព្រះរាជពិធីបុណ្យចម្រើនព្រះជន្ម សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ និងរួមចំណែកគាំទ្រយុទ្ធនាការទីក្រុងស្អាត និងបៃតង ហើយក៏ដើម្បីស្វែងមូលនិធិសប្បុរសធម៌ជួយដល់មន្ទីរគន្ធបុប្ផា។ ម្យ៉ាងក៏ដើម្បីផ្សព្វផ្សាយពីយុទ្ធនាការឆ្ពោះទៅស៊ីហ្គេមឆ្នាំ២០២៣ នៅកម្ពុជាផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
