ដោយដកស្រង់សម្តីក្រុមហ៊ុនទិន្នន័យសមុទ្រ Lloyd’s List Intelligence សារព័ត៌មាន AP បានរាយការណ៍ថា នាវាជិត ៩០គ្រឿង ដែលក្នុងនោះមាននាវាដឹកប្រេងផងដែរ បានឆ្លងកាត់ច្រកសមុទ្រ     ហ័រមូស ចាប់តាំងពីការចាប់ផ្តើមនៃការកើនឡើងភាពតានតឹងនៅមជ្ឈិមបូព៌ា នៅចុងខែកុម្ភៈ។  

នេះបើយោងតាមក្រុមហ៊ុន យ៉ាងហោចណាស់មាននាវា ចំនួន ៨៩គ្រឿង បានឆ្លងកាត់ច្រកសមុទ្រហ័រមូស ចន្លោះថ្ងៃទី ០១ និងទី ១៥ ខែមីនា ក្នុងនោះមាននាវាដឹកប្រេងចំនួន ១៦គ្រឿង។ ក្រុមនេះ បានបញ្ជាក់ថា នៅមុនពេលសហរដ្ឋអាមេរិក និងអ៊ីស្រាអែល វាយប្រហារអ៊ីរ៉ង់ នាវាប្រហែល ១០០ ទៅ ១៣៥គ្រឿង បានឆ្លងកាត់ច្រកសមុទ្រនេះ ក្នុងមួយថ្ងៃ។ មួយភាគប្រាំនៃនាវាចំនួន ៨៩គ្រឿង ត្រូវបានគេជឿថា មានទំនាក់ទំនងជាមួយអ៊ីរ៉ង់ ខណៈដែលនាវាដែលមានទំនាក់ទំនងជាមួយចិន និងក្រិកស្ថិតក្នុងចំណោមនាវាទាំងនោះ។ 

លោក Richard Meade និពន្ធនាយកនៃក្រុមហ៊ុន Lloyd’s List បាននិយាយថា អ៊ីរ៉ង់ប្រហែលជាបាន «បង្កើតច្រករបៀងសុវត្ថិភាពប្រកបដោយប្រសិទ្ធភាព» ដោយមាននាវាមួយចំនួនឆ្លងកាត់ជិតឆ្នេរសមុទ្រអ៊ីរ៉ង់។ នេះក៏អនុវត្តចំពោះនាវាដឹកប្រេងអ៊ីរ៉ង់ផងដែរ។ យោងតាមការប៉ាន់ស្មានដោយក្រុមហ៊ុនវិភាគ Kpler សាធារណរដ្ឋឥស្លាមនេះ បាននាំចេញប្រេងឆៅជាង ១៦លានបារ៉ែលរួចហើយ ចាប់តាំងពីដើមខែមីនា

លោក Kun Cao ប្រធានផ្នែកទំនាក់ទំនងអតិថិជននៅក្រុមហ៊ុនប្រឹក្សាយោបល់ Reddal បាននិយាយថា ការឆ្លងកាត់ចុងក្រោយបំផុតតាមច្រកសមុទ្រហ័រមូស បង្ហាញថា ច្រកសមុទ្រនេះ ត្រូវបាន «បិទជាជម្រើសប្រឆាំងនឹងចរាចរណ៍មួយចំនួន ខណៈពេលដែលនៅតែដំណើរការសម្រាប់ការនាំចេញរបស់អ៊ីរ៉ង់ និងការធ្វើដំណើរមិនមែនអ៊ីរ៉ង់មួយចំនួនតូចដែលត្រូវបានអនុម័ត»។ 

អ្នកនាំពាក្យក្រសួងការបរទេសអ៊ីរ៉ង់ Esmaeil Baghaei បាននិយាយកាលពីថ្ងៃចន្ទថា នាវានៃប្រទេសជាច្រើន បានឆ្លងកាត់ច្រកសមុទ្រហ័រមូស ដោយមានការអនុញ្ញាតពីទីក្រុងតេអេរ៉ង់ ដោយបន្ថែមថា អ៊ីរ៉ង់មានសិទ្ធិចាត់វិធានការចាំបាច់ ដើម្បីធានាសន្តិសុខជាតិ និងទប់ស្កាត់ការរំលោភបំពានដោយអ្នកឈ្លានពាន និងសម្ព័ន្ធមិត្តរបស់ពួកគេ នៅលើផ្លូវទឹកនេះ៕