រដ្ឋមន្ត្រីប្រេងរបស់ប្រទេសអ៊ីរ៉ាក់ កាលពីថ្ងៃអង្គារ (ទី១៧ ខែមីនា ឆ្នាំ២០២៦) បានឲ្យដឹងថា រដ្ឋាភិបាលអ៊ីរ៉ាក់ និងរដ្ឋបាលតំបន់ឃឺដ (KRG) បានឈានដល់កិច្ចព្រមព្រៀង ដើម្បីចាប់ផ្ដើមការនាំចេញប្រេងឡើងវិញទៅកាន់មជ្ឈមណ្ឌលថាមពល Ceyhan របស់ប្រទេសទួរគី ចាប់ពីថ្ងៃទី១៨ ខែមីនា។

ដោយដកស្រង់សម្តីរបស់រដ្ឋមន្ត្រីប្រេងអ៊ីរ៉ាក់ លោក Hayan Abdel-Ghani ប្រព័ន្ធផ្សព្វផ្សាយរដ្ឋបានរាយការណ៍ថា លំហូរប្រេងពីកំពង់ផែ Ceyhan ត្រូវបានគេរំពឹងថា នឹងចាប់ផ្តើមនៅម៉ោង ១០ព្រឹក (ម៉ោងក្នុងស្រុក) នៅថ្ងៃទី១៨ ខែមីនា។

ក្រុម KRG បានបញ្ជាក់ពីកិច្ចព្រមព្រៀងនេះ ដោយឲ្យដឹងនៅក្នុងសេចក្តីថ្លែងការណ៍មួយថា ភាគីទាំង២ នឹងបង្កើតគណៈកម្មាធិការរួមមួយ ដើម្បីរៀបចំចាប់ផ្ដើមការនាំចេញប្រេងឡើងវិញ តាមរយៈបំពង់បង្ហូរប្រេងរបស់តំបន់នេះ ចាប់ពីថ្ងៃទី១៨ ខែមីនា ដោយចំណូលនឹងត្រូវប្រគល់ត្រឡប់ទៅរតនាគារសហព័ន្ធ។

ជាមួយគ្នានេះ ក្រុម KRG បានប្រាប់ឲ្យដឹងទៀតថា ភាគីទាំង២ ក៏បានយល់ព្រមផងដែរ ក្នុងការចាត់វិធានការសន្តិសុខចាំបាច់ ដើម្បីការពារតំបន់វាលប្រេង និងធានាបាននូវនិរន្តរភាពនៃប្រតិបត្តិការនាំចេញ។

លោក Masrour Barzani ប្រមុខដឹកនាំ KRG បានលើកឡើងនៅក្នុងសារមួយលើបណ្ដាញសង្គម X ថា តំបន់នេះនឹងអនុញ្ញាតឲ្យមានការនាំចេញប្រេងឆៅ តាមរយៈបំពង់បង្ហូរប្រេងតំបន់ពាក់កណ្ដាលស្វយ័តឃឺដអ៊ីរ៉ាក់ឲ្យបានឆាប់បំផុតតាមដែលអាចធ្វើទៅបាន «ដោយសារតែបញ្ហាដែលប្រទេសកំពុងប្រឈមជាមួយ»៕