ស៊ីហ្គេម៖ នៅសល់មិនដល់ពីរខែទៀតទេការប្រកួតកីឡាអាស៊ីអាគ្នេយ៍លើកទី៣១ នឹងដំណើរការជាផ្លូវការ។ បច្ចុប្បន្ននេះម្ចាស់ផ្ទះវៀតណាមកំពុងតែប្រឹងប្រែងយ៉ាងខ្លាំង ដើម្បីបញ្ចប់ការរៀបចំចុងក្រោយឱ្យព្រឹត្តិការណ៍កីឡាដ៏ធំប្រចាំតំបន់នេះទទួលបានសុវត្ថិភាព និងជោគជ័យ។
ដោយសារតែការរីករាលដាលជំងឺកូវីដ-១៩ ស៊ីហ្គេមលើកទី៣១ មិនអាចកើតឡើងដូចការគ្រោងទុកនៅខែវិច្ឆិកា ឆ្នាំ២០២១ នោះទេ ហើយត្រូវពន្យារហូតមកដល់ខែឧសភា ឆ្នាំ២០២២នេះ។ គណៈកម្មាធិការរៀបចំការប្រកួតប្រឈមនឹងផលលំបាកក្នុងការរៀបចំ ខណៈអត្តពលិកមិនមានឱកាសជាក់លាក់ប្រកួត និងហ្វឹកហាត់ក្រៅស្រុក។ ចំពោះមុខគោលដៅនៃការរៀបចំព្រឹត្តិការណ៍កីឡានេះឱ្យជោគជ័យជាកិច្ចការចម្បង ខណៈកាលពីពេលថ្មីប្រតិភូកីឡាជាន់ខ្ពស់អាស៊ានបានធ្វើទស្សនកិច្ចកន្លែងប្រកួតនៅទីក្រុងហាណូយ និងខេត្តក្បែរខាង ហើយសុទ្ធតែសម្ដែងនូវការពេញចិត្តចំពោះការរៀបចំរបស់វៀតណាម ទោះបីកន្លែងខ្លះនៅមិនទាន់រួចរាល់ទាំងស្រុងក៏ដោយ។
ការប្រកួតកីឡាអាស៊ីអាគ្នេយ៍លើកទី៣១ ដែលធ្វើឡើងក្រោមពាក្យស្លោក “ដើម្បីអាស៊ានកាន់តែខ្លាំងក្លា” ដំណើរការប្រកួតពីថ្ងៃទី១២ ដល់ថ្ងៃទី២៣ ខែឧសភា ឆ្នាំ២០២២ នៅទីក្រុងហាណូយ និង ១១ខេត្ត-ក្រុងជិតខាងផ្សេងទៀតដោយប្រកួតលើ ៤០ប្រភេទកីឡា (៥២៦វិញ្ញាសា) ហើយរំពឹងថាអត្តពលិក ១០,០០០នាក់ចូលរួមប្រកួត៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
