ដោយដកស្រង់សម្តីមន្ត្រីទីក្រុងវ៉ាស៊ីនតោន សារព័ត៌មាន ABC News បានរាយការណ៍ថា យានដ្រូន MQ-9 Reaper ផលិតនៅអាមេរិកជាង ១០គ្រឿង បានបាត់បង់ នៅក្នុងការប្រយុទ្ធ ជាផ្នែកមួយនៃប្រតិបត្តិការប្រឆាំងនឹងអ៊ីរ៉ង់។  

យោងតាមមន្ត្រីទាំងនោះ យានដ្រូនប្រភេទនេះ មានតម្លៃ ១៦លានដុល្លារ ក្នុងមួយគ្រឿង នៅពេលទិញជាក្រុមដែលមានដ្រូនចំនួន ៤គ្រឿង។

ប្រព័ន្ធផ្សព្វផ្សាយនេះ បានចង្អុលបង្ហាញថា កងទ័ពអាកាសសហរដ្ឋអាមេរិក បានប្រកាសពីកិច្ចសន្យាទិញរយៈពេល ៥ឆ្នាំចុងក្រោយរបស់ខ្លួនសម្រាប់យានដ្រូន Reapers ក្នុងឆ្នាំ ២០២០ ហើយក្រុមហ៊ុនផលិត General Atomics បានបិទខ្សែច្រវ៉ាក់ផលិតកម្ម កាលពីឆ្នាំមុន បន្ទាប់ពីបានផលិតយានដ្រូនប្រភេទនេះ ចំនួន ៥៧៥គ្រឿង។

កងកម្លាំងឆ្មាំបដិវត្តន៍ឥស្លាមអ៊ីរ៉ង់ (IRGC) បានរាយការណ៍កាលពីសប្តាហ៍មុនថា ប្រព័ន្ធការពារដែនអាកាសរបស់ប្រទេសនេះ បានស្ទាក់យានដ្រូនចំនួន ១១២ គ្រឿង ក្នុងនោះមានដ្រូន MQ-9 ផងដែរ ចាប់តាំងពីការចាប់ផ្តើមនៃការឈ្លានពានរបស់សហរដ្ឋអាមេរិក និងអ៊ីស្រាអែល។

យោងតាមក្រុមហ៊ុន General Atomics យានដ្រូនប្រភេទនេះ កំពុងត្រូវបានប្រើប្រាស់ដោយកងទ័ពអាកាសរបស់ចក្រភពអង់គ្លេស អេស្ប៉ាញ អ៊ីតាលី និងបារាំង៕