ការិយាល័យប្រធានាធិបតីកូរ៉េខាងត្បូងនិយាយនៅថ្ងៃពុធនេះថា កូរ៉េខាងត្បូង ទទួលបានការសន្យាពីអារ៉ាប់រួម ក្នុងការផ្គត់ផ្គង់ប្រេងឆៅ ២៤លានបារ៉ែល ស្របពេលអាជ្ញាធរដាក់ចេញវិធានការទប់ទល់នឹងផលប៉ះពាល់ដោយសារជម្លោះនៅមជ្ឈិមបូព៌ា ។

លោក Kang Hoon-sik គឺជាអគ្គសេនាធិការលោកប្រធានាធិបតី Lee Jae Myung និយាយប្រាប់សន្និសីទសារព័ត៌មានថា អារ៉ាប់រួមនិយាយថា ពួកគេនឹងផ្តល់កូរ៉េខាងត្បូងដែលជាប្រទេសនាំចូលប្រេងធំបំផុតលំដាប់ទី ៤របស់ពិភពលោក នូវអាទិភាពកំពូលសម្រាប់ការផ្គត់ផ្គង់ប្រេងឆៅ ។

បន្ទាប់វិលត្រឡប់ពីអារ៉ាប់រួមវិញ លោក Kang និយាយថា ពួកគេសន្យាច្បាស់លាស់ថា ពុំមានប្រទេសណានឹងទទួលបានប្រេងមុនកូរ៉េខាងត្បូងនោះទេ ហើយកូរ៉េខាងត្បូង គឺជាអាទិភាពលេខ ១ នៅក្នុងការផ្គត់ផ្គង់ប្រេងឆៅ ។

ទោះបីជាយ៉ាងណាក៏ដោយ ស្របពេលដែលលោកបញ្ជាក់ពីផែនការនាំចូលប្រេងឆៅបន្ទាន់ ១៨លានបារ៉ែល លោក Kang ពុំបានផ្តល់ពេលវេលាច្បាស់លាស់សម្រាប់ការចែកចាយរបស់ពួកគេនោះឡើយ ហើយនិងពុំមានរឿងរ៉ាវលម្អិតនោះដែរចំពោះផ្លូវដឹកជញ្ជូនដ៏មានសក្តានុពលដែលនឹងបញ្ចៀសច្រកសមុទ្រ Hormuz ។

ការបិទដោយប្រសិទ្ធិភាពរបស់អ៊ីរ៉ង់នូវច្រកសមុទ្រ Hormuz បានបង្ខំឲ្យអារ៉ាប់រួម បិទផលិតកម្មរបស់ខ្លួន ដោយកាត់បន្ថយទិន្នផលប្រេងជាងពាក់កណ្តាល ខណៈការផ្ទុកនៅចំណត Fujairah ត្រូវបានរំខានដោយសារការវាយប្រហារយានដ្រូន ៕