ទិន្នន័យផ្លូវការ បានបង្ហាញនៅថ្ងៃពុធ (ទី១៨ ខែមីនា ឆ្នាំ២០២៦) នេះថា ភ្ញៀវទេសចរចិនទៅលេងកម្សាន្តប្រទេសជប៉ុន បានធ្លាក់ចុះ ៤៥,២ភាគរយ នៅក្នុងខែកុម្ភៈ បើធៀបនឹងឆ្នាំមុន ដោយនេះគឺជាផលប៉ះពាល់ ដោយសារជម្លោះផ្នែកការទូត រវាងប្រទេសទាំង២ ដែលអូសបន្លាយរយៈពេល ៣ខែជាប់គ្នា។

នៅមុននេះ អ្នកធ្វើដំណើរចិន គឺជាប្រភពភ្ញៀវទេសចរដ៏ធំបំផុត នៅជប៉ុន ដែលរួមចំណែកដល់ការរីកចម្រើន នៅក្នុងទឹកដីនៃផ្កាសាគូរ៉ា និងភ្នំហ្វូជី ដោយការទៅលេងនោះត្រូវបានជំរុញដោយសារប្រាក់យ៉េនធ្លាក់ទាប ដែលធ្វើឲ្យការដើរទិញឥវ៉ាន់មានតម្លៃថោក។

ប៉ុន្តែនៅក្នុងខែមករា កូរ៉េខាងត្បូងបានវ៉ាដាច់ចិន ក្នុងនាមជាក្រុមទេសចរធំបំផុត ជានិន្នាការមួយដែលបន្តនៅក្នុងខែកុម្ភៈ ដោយភ្ញៀវទេសចរមកពីប្រទេសនេះ បានកើនឡើង ២៨,២ភាគរយ ពោលគឺដល់ចំនួន ១,១លាននាក់។ អង្គការទេសចរណ៍ជាតិជប៉ុន បានឲ្យដឹងថា ចំនួននោះប្រៀបធៀបទៅនឹងភ្ញៀវទេសចរចំនួន ៣៩៦.៤០០នាក់ មកពីចិនដីគោក កាលពីខែមុន។

ទិន្នន័យបានបង្ហាញថា តាមការប្រៀបធៀប ប្រទេស និងតំបន់ចំនួន ១៨ បានបង្កើតកំណត់ត្រាថ្មី សម្រាប់ចំនួននៃពលរដ្ឋរបស់ពួកគេដែលបានទៅលេងកម្សាន្តប្រទេសជប៉ុន ក្នុងខែកុម្ភៈ ក្នុងនោះរួមមានទាំងកូរ៉េខាងត្បូង កោះតៃវ៉ាន់ និងសហរដ្ឋអាមេរិកផងដែរ។ ចំនួនភ្ញៀវទេសចរមកពីទីក្រុងហុងកុង ក៏បានកើនឡើង ១៩,៦ភាគរយផងដែរ បើប្រៀបធៀបទៅនឹងឆ្នាំមុន។

ចំនួនអ្នកទេសចរចិនទៅកម្សាន្តប្រទេសជប៉ុន បានធ្លាក់ចុះ ៤៥ភាគរយរួចហើយ កាលពីខែធ្នូឆ្នាំមុន និងធ្លាក់ចុះយ៉ាងខ្លាំង ៦០,៧ភាគរយ នៅខែមករា។ ផ្ទុយទៅវិញ ប្រទេសដទៃទៀត រួមទាំងកូរ៉េខាងត្បូង បានឃើញចំនួនអ្នកទេសចរចិនកើនឡើង។

ទំនាក់ទំនងជប៉ុន-ចិន មានសភាពកាន់តែអាក្រក់ទៅៗ ចាប់តាំងពីលោកស្រីនាយករដ្ឋមន្ត្រី Sanae Takaichi បានលើកឡើងកាលពីខែវិច្ឆិកាឆ្នាំមុនថា ជប៉ុនអាចធ្វើអន្តរាគមន៍យោធា អំឡុងពេលមានប៉ុនប៉ងណាមួយរបស់ចិន ក្នុងការគ្រប់គ្រងកោះតៃវ៉ាន់ដែលទីក្រុងប៉េកាំងចាត់ទុកថា ជាផ្នែកនៃទឹកដីរបស់ខ្លួន៕