វិមានក្រឹមឡាំង នៅថ្ងៃពុធ (ទី១៨ ខែមីនា ឆ្នាំ២០២៦) នេះ បានថ្កោលទោសអ្វីដែលខ្លួនចាត់ទុកថា ជា «ឃាតកម្ម» លើមេដឹកនាំអ៊ីរ៉ង់ អំឡុងការវាយប្រហារតាមអាកាសដោយសហរដ្ឋអាមេរិក និងអ៊ីស្រាអែល ដោយនេះ កើតមានឡើងមួយថ្ងៃបន្ទាប់ពីទីភ្នាក់ងារសារព័ត៌មានពាក់កណ្តាលផ្លូវការរបស់អ៊ីរ៉ង់ Fars បានបញ្ជាក់ថា លោក Ali Larijani ទីប្រឹក្សាជាន់ខ្ពស់របស់អតីតសពមេដឹកនាំកំពូលអ៊ីរ៉ង់ លោក Ayatollah Ali Khamenei ត្រូវបានសម្លាប់នៅទីក្រុងតេអេរ៉ង់។

នៅពេលត្រូវបានសួរ អំពីប្រតិកម្មរបស់រុស្ស៊ី ចំពោះការស្លាប់របស់លោក Larijani អ្នកនាំពាក្យវិមានក្រឹមឡាំង លោក Dmitry Peskov បានឆ្លើយប្រាប់អ្នកសារព័ត៌មានថា៖ «យើងថ្កោលទោសយ៉ាងដាច់អហង្ការ ចំពោះវិធានការណាមួយដែលមានគោលបំណងធ្វើឲ្យប៉ះពាល់ដល់សុខភាព ឬការសម្លាប់ ឬការលុបបំបាត់សមាជិកថ្នាក់ដឹកនាំនៃប្រទេសអ៊ីរ៉ង់ដែលមានអធិបតេយ្យភាព និងឯករាជ្យ ក៏ដូចជាប្រទេសដទៃទៀត។ យើងថ្កោលទោសចំណាត់ការបែបនេះ»។

រុស្ស៊ី ដែលបានសាងសង់ និងជួយដំណើរការរោងចក្រថាមពលនុយក្លេអ៊ែរតែមួយគត់របស់អ៊ីរ៉ង់ បានរិះគន់យ៉ាងខ្លាំង ចំពោះការវាយប្រហារតាមអាកាសរបស់សហរដ្ឋអាមេរិក-អ៊ីស្រាអែល លើអ៊ីរ៉ង់ ដែលជាដៃគូជិតស្និទ្ធ ហើយបានអំពាវនាវឲ្យមានបទឈប់បាញ់ និងការចរចាជាបន្ទាន់។

ដោយដកស្រង់សម្តីបុគ្គលដែលដឹងពីបញ្ហានេះ សារព័ត៌មាន Wall Street Journal បានរាយការណ៍កាលពីថ្ងៃអង្គារថា រុស្ស៊ីបានពង្រីកការចែករំលែកព័ត៌មានស៊ើបការណ៍សម្ងាត់ និងកិច្ចសហប្រតិបត្តិការយោធាជាមួយទីក្រុងតេអេរ៉ង់ ដោយផ្តល់រូបភាពផ្កាយរណប និងបច្ចេកវិទ្យាយានដ្រូន ដើម្បីជួយអ៊ីរ៉ង់ ក្នុងការកំណត់គោលដៅកងកម្លាំងអាមេរិក នៅក្នុងតំបន់។

លោកបាននិយាយថា៖ «ដូចដែលអ្នកបានដឹងហើយថា បច្ចុប្បន្នមានរបាយការណ៍ផ្សេងៗគ្នាជាច្រើន កំពុងចរាចរ អំពីសង្គ្រាមនេះ។ ភាគច្រើន គឺគ្មានអ្វីក្រៅពីព័ត៌មានមិនពិតទេ ដូច្នេះយើងមិនចាត់ទុកថា វាគឺជារឿងចាំបាច់ ក្នុងការធ្វើការអត្ថាធិប្បាយលើព័ត៌មាននីមួយៗនោះទេ»៕