ការរីករាលដាល់ភ្លើងឆេះព្រៃ កាន់តែខ្លាំងក្លាឡើងនៅទូទាំងពិភពលោក ក្នុងរយៈពេល ១ឆ្នាំកន្លងមកនេះ បណ្តាលឲ្យមានការបំផ្លិចបំផ្លាញទ្រង់ទ្រាយធំ ។ អង្គការសហប្រជាជាតិ(UN)ប៉ាន់ប្រមាណថា ភ្លើងឆេះព្រៃបានបំផ្លិចបំផ្លាញដីព្រៃ ៣៩០លានហិចតានៅទូទាំងពិភពលោក អំឡុងឆ្នាំ ២០២៥ ពោលគឺមានផ្ទៃដីស្មើនឹងជិតសហភាពអឺរ៉ុបទាំងមូល ។

ជប៉ុនប្រឈមដូចគ្នានឹងគ្រោះមហន្តរាយភ្លើងឆេះព្រៃនេះ ។ ស្ថានភាពអាកាសធាតុស្ងួតខ្លាំងរយៈពេលយូរ បង្កឲ្យមានភ្លើងឆេះព្រៃទាំងនៅក្នុងទីក្រុង និងតាមតំបន់ព្រៃភ្នំ ។ កាលពីខែមករា ភ្លើងឆេះព្រៃនៅខេត្ត Yamanashi បានបំផ្លិចបំផ្លាញដីព្រៃជិត ៤០០ហិចតា ហើយនិងចំណាយពេលជាង ១ខែ ទើបអាចគ្រប់គ្រងវាបាន ។

ស្របពេលហានិភ័យកើនឡើងទាំងអស់នេះ ទីក្រុងមួយរបស់ជប៉ុន បានចំណាយពេលជាង ១សតវត្សរ៍ រៀនពីវិធីសាស្រ្តដោះស្រាយបញ្ហាភ្លើងឆេះព្រៃ ។ ទីក្រុង Hakodate ដែលជាទីក្រុងកំពង់ផែដ៏ស្រស់ស្អាតមួយនៅកោះភាគខាងជើង Hokkaido របស់ជប៉ុន មានប្រវត្តិសាស្រ្តភ្លើងឆេះព្រៃដ៏ខ្ទេចខ្ទាំ ។

សព្វថ្ងៃ តាមដងផ្លូវនៅក្នុងទីក្រុងមួយនេះ មានស្លាកសញ្ញាដាស់តឿនពីរឿងរ៉ាវអតីតកាលនៃភ្លើងឆេះព្រៃ រួមទាំងមានក្បាលម៉ាស៊ីនទឹកពន្លត់អគ្គិភ័យពណ៌លឿងផងដែរ ។ នៅកន្លែងផ្សេងទៀតនៅក្នុងប្រទេសជប៉ុន ក្បាលម៉ាស៊ីនទឹកពន្លត់អគ្គិភ័យមានពណ៌ក្រហម ។ ជម្រើសរបស់ទីក្រុង Hakodate ក្នុងការលាបពណ៌លឿងលើក្បាលម៉ាស៊ីនទឹកពន្លត់អគ្គិភ័យ ដោយសារមានរឿងរ៉ាវដ៏សែនជូចត់ ។

ចាប់ពីចុងសតវត្សរ៍ទី ១៩ រហូតដល់ដើមសតវត្សរ៍ទី ២០ ទីក្រុងមួយនេះ បានជួបហេតុការណ៍ភ្លើងឆេះព្រៃម្តងហើយម្តងទៀត ។ ភ្លើងឆេះព្រៃស្លាប់មនុស្សច្រើនបំផុត បានកើតឡើងកាលពីឆ្នាំ ១៩៣៤ ពេលដែលភ្លើងឆេះព្រៃទ្រង់ទ្រាយធំមួយ បានបំផ្លាញ ២ភាគ៣ នៃទីក្រុង Hakodate និងបានសម្លាប់មនុស្សជាង ២ពាន់នាក់ ។ ក្រោយមក ក្រុមនគរូបនីយកម្មទីក្រុងមួយនេះ បានធ្វើដំណើរទៅកាន់សហរដ្ឋអាមេរិក ដើម្បីសិក្សាពីវិធីធ្វើទំនើបកម្មហេដ្ឋារចនាសម្ព័ន្ធពន្លត់អគ្គីភ័យ និងទប់ស្កាត់គ្រោះមហន្តរាយនាពេលអនាគត ។

ក្រោយមកពួកគេបានរចនាក្បាលមីស៊ីនទឹកពន្លត់អគ្គិភ័យមានក្បាល ៣ ជំនួសឲ្យក្បាលមួយ ដើម្បីងាយស្រួលក្នុងការបញ្ចេញទឹក អំឡុងពេលគ្រាអាសន្ន ៕