អ្នកការទូតអាមេរិក លោក Tom Barrack កាលពីថ្ងៃអង្គារ (ទី១៧ ខែមីនា ឆ្នាំ២០២៦) បានបដិសេធរបាយការណ៍ ដែលថា ទីក្រុងវ៉ាស៊ីនតោនបានជំរុញឲ្យស៊ីរីពិចារណាបញ្ជូនកងកម្លាំងទៅកាន់ភាគខាងកើតប្រទេសលីបង់ ដើម្បីជួយដល់វិធានការរំសាយអាវុធក្រុមហេសបូឡា។

ដោយដកស្រង់សម្តីពីមនុស្ស ៥នាក់ដែលបានប្រាប់អំពីបញ្ហានេះ សារព័ត៌មាន Reuters បានរាយការណ៍ថា សហរដ្ឋអាមេរិកបានជំរុញឲ្យស៊ីរីពិចារណាបញ្ជូនកងកម្លាំងទៅកាន់ប្រទេសជិតខាងរបស់ខ្លួន ប៉ុន្តែទីក្រុងដាម៉ាស រារែកក្នុងការចាប់ផ្ដើមអនុវត្តបេសកកម្មបែបនេះ ដោយសារបារម្ភថា ត្រូវចូលទៅពាក់ព័ន្ធក្នុងសង្គ្រាម នៅតំបន់មជ្ឈិមបូព៌ា និងបង្កឲ្យមានភាពតានតឹងនិកាយសាសនា។

តែនៅក្នុងការបង្ហោះមួយលើបណ្ដាញ X បេសកជនអាមេរិក ប្រចាំប្រទេសស៊ីរី និងតួកគី បានលើឡើងថា របាយការណ៍ «ទាក់ទងនឹងសហរដ្ឋអាមេរិកជំរុញឲ្យស៊ីរីបញ្ជូនកងកម្លាំងទៅកាន់ប្រទេសលីបង់ គឺមិនពិត និងមិនត្រឹមត្រូវឡើយ»។

យ៉ាងណាក្ដី សារព័ត៌មាន Reuters បានឲ្យដឹងថា ខ្លួន «បានជួបជាមួយប្រភពចំនួន ១០រូប សម្រាប់ការចេញអត្ថបទនេះ ដោយក្នុងនោះមានមន្ត្រីស៊ីរី និងទីប្រឹក្សារដ្ឋាភិបាលចំនួន ៦នាក់ អ្នកការទូតលោកខាងលិច ២នាក់ មន្ត្រីអឺរ៉ុបម្នាក់ និងប្រភពស៊ើបការណ៍សម្ងាត់លោកខាងលិច»។ តាមសេចក្ដីរាយការណ៍ អ្នកទាំងអស់នោះ បាននិយាយថា រដ្ឋាភិបាលស៊ីរីបានពិចារណាដោយប្រុងប្រយ័ត្ន ជុំវិញប្រតិបត្តិការឆ្លងកាត់ព្រំដែន ប៉ុន្តែនៅតែមានភាពរារែក៕