​បាល់ទាត់៖ ​ខ្សែប្រយុទ្ធ​ក្រុម​បិសាច​ក្រហម Manchester United, Cristiano Ronaldo នឹង​បន្ត​លេង​បាល់​អាជីព​កំរិត​កំពូលដដែល​ទោះ​ឈានដល់​វ័យ ៣៧ឆ្នាំ​ក៏ដោយ និង​មិនទាន់​គិតគូរ​រឿង​ចូលនិវត្តន៍​ផងដែរ​។ ​​កីឡាករ​វ័យ ៣៧ឆ្នាំ​រូបនេះ​ត្រូវបាន​ចោទសួរ​ដោយ​អ្នកសារព័ត៌មាន​ អំឡុង​សន្និសីត​សារព័ត៌មាន​មុន​​ការប្រកួត Play-Off ផ្តាច់ព្រ័ត្រ​ដើម្បី​កៅអី World Cup 2022 នៅ​កាតា​។

​​ម្ចាស់​ជ័យលាភី Ballon d’Or ប្រាំ​លើក​រូបនេះមាន​ទំនុកចិត្ត​ខ្ពស់​សំរាប់​ការប្រកួត​ចំពោះមុខ​ ទល់នឹង​ម៉ា​សេ​ដ្វា​ន់​ខាងជើង​នៅលើ​ទឹកដី​ព័រទុយហ្កាល់​របស់ខ្លួន​ផងដែរ​។ ​​ចំណែក​ក្រុម​ម៉ា​សេ​ដ្វា​ន់​ខាងជើង គ្រូ​បង្គោល​លោក Blagoja Milevski បាន​និយាយថា​ លោក​ពិតជា​គោរព​គូប្រកួតចំពោះមុខ ព័រទុយហ្កាល់​មាន​កីឡាករ​អស្ចារ្យ​ជាច្រើន​មិនមែន​តែ​ម្នាក់​ឡើយ តែ​លោក​ក៏​ចង់​បញ្ជាក់ដែរថា ​ក្រុម​របស់លោកមកដល់​ទឹកដី​ព័រទុយហ្កាល់​នេះ​មិនមែន​មក​ទេសចរ​ទេ​។

​​លោក​បាន​បន្តថា គ្រប់គ្នា​មិនដែល​បានគិត​ទេ​ថា ​ម៉ា​សេ​ដ្វា​ន់​ខាងជើង​មកដល់​វគ្គ​នេះ តែ​រឿង​ភ្ញាក់ផ្អើល​បានកើត​ឡើង​រួចហើយ ហើយ​ក្រុម​របស់លោក​នឹង​បន្តធ្វើ​វា​ម្តងទៀត​។ ​​សូមបញ្ជាក់ថា ​ម៉ា​សេ​ដ្វា​ន់​ខាង​ជើងបាន​ឡើងមក​ដល់​វគ្គ​នេះ ក្រោយ​ទំលាក់​ក្រុម​ជើងឯក Euro 2020 អ៊ីតាលី​គួរ​ឱ្យភ្ញាក់ផ្អើលដល់​ទឹកដី​អ៊ីតាលី​តែម្តង ដែល​ធ្វើឱ្យ​អ៊ីតាលី​ខក​ខាន​មិនបាន​បង្ហាញ​ខ្លួន​នៅ World Cup ២ព្រឹត្តិការណ៍​ជាប់​គ្នា​៕

​អត្ថបទ​៖​នាង សុភា​វុ​ធ