យោងតាមប្រព័ន្ធផ្សព្វផ្សាយ CNN កាលពីថ្ងៃអង្គារ (ទី១៧ ខែមីនា ឆ្នាំ២០២៦) បានឲ្យដឹងថា នាវាចម្បាំងសហរដ្ឋអាមេរិក ១គ្រឿង ដែលដឹកទាហានម៉ារីន និងនាវិករាប់ពាន់នាក់ នឹងឆ្លងកាត់ច្រកសមុទ្រ Malacca នៅលើផ្លូវទៅកាន់តំបន់មជ្ឈិមបូព៌ា។

ប្រព័ន្ធផ្សព្វផ្សាយ CNN បានរាយការណ៍ថា នាវាចម្បាំង USS Tripoli កំពុងធ្វើដំណើរជិតដល់ប្រទេសសិង្ហបុរីហើយ នៅជ្រុងភាគនិរតីនៃសមុទ្រចិនខាងត្បូង កាលពីព្រឹកថ្ងៃទី១៧ ខែមីនា។ នេះបើយោងតាមទិន្នន័យប្រព័ន្ធតាមដាន AIS ដែល CNN បានឃើញ។ មន្ត្រីអាមេរិកបានប្រាប់ប្រព័ន្ធផ្សព្វផ្សាយ CNN ថា នាវាចម្បាំងនេះកំពុងត្រូវបានដាក់ពង្រាយទៅកាន់តំបន់នេះ ទោះបីជាពួកគេមិនបានបង្ហាញពីគោលដៅ ឬបេសកកម្មពិតប្រាកដរបស់នាវានេះក៏ដោយ។

សារព័ត៌មាននេះបានរាយការណ៍ថា៖ «នាវាកងទ័ពជើងទឹកអាមេរិកតែងតែធ្វើដំណើរដោយបិទឧបករណ៍បញ្ជូនសញ្ញាតាមដាន AIS។ តែការបង្ហាញទីតាំងរបស់ពួកគេ ខណៈពេលកំពុងធ្វើដំណើរឆ្លងកាត់តំបន់ដែលមានចរាចរណ៍ផ្លូវសមុទ្រច្រើន ដូចជាដែនទឹក ជុំវិញប្រទេសសិង្ហបុរីនេះ អាចឲ្យប្រតិបត្តិការកាន់តែមានសុវត្ថិភាព»។

ចំណែកវេបសាយ Marinetraffic.com បានបង្ហាញផ្លូវធ្វើនាវាចរ សម្រាប់ «នាវាចម្បាំងអាមេរិកដោយមិនដាក់ឈ្មោះ» ដែលចាកចេញពីកោះ Okinawa របស់ប្រទេសជប៉ុន កាលពីថ្ងៃទី១១ ខែមីនា ឆ្លងកាត់សមុទ្រចិនខាងត្បូង និងជិតដល់ប្រទេសសិង្ហបុរី នៅថ្ងៃទី១៧ ខែមីនា ក្នុងល្បឿនប្រហែល ២២ម៉ាយល៍ ក្នុងមួយម៉ោង (៣៥,៤គីឡូម៉ែត្រ ក្នុងមួយម៉ោង)។

បើយោងតាមមន្ត្រី ៣នាក់ដែលដឹងពីផែនការនេះ បានប្រាប់ថា នាវាចម្បាំងនេះត្រូវបានគេជឿថា កំពុងដឹកកងទ័ពមកពីអង្គភាពបេសកកម្មម៉ារីនទី៣១ (MEU) ដែលមានមូលដ្ឋាននៅកោះ Okinawa ដែលជាកម្លាំងឆ្លើយតបរហ័សចំនួន ២.២០០នាក់ បន្ទាប់ពីមន្ទីរបញ្ចកោណបានបញ្ជាឲ្យដាក់ពង្រាយអង្គភាពនេះ ។

ដោយមានមូលដ្ឋាននៅទីក្រុង Sasebo ប្រទេសជប៉ុន នាវា USS Tripoli មានប្រវែងជិត ២៦០ម៉ែត្រ ដោយមានទំងន់ ៤៥.០០០តោន។ ដើមឡើយ វាបម្រើជានាវាផ្ទុកយន្តហោះតូចមួយ។ ការធ្វើចរាចររបស់នាវាចម្បាំងនេះ បង្ហាញពីរបៀបដែលជម្លោះនៅតំបន់មជ្ឈិមបូព៌ា កំពុងជះឥទ្ធិពលជាយុទ្ធសាស្ត្រ លើតំបន់អាស៊ីអាគ្នេយ៍៕