គ្រឿងចក្របានបោសសម្អាតកម្ទេចកម្ទីនៅសង្កាត់ Bachoura ស្ថិតនៅកណ្តាលទីក្រុងបេរូតនាថ្ងៃពុធនេះ ក្រោយការវាយប្រហាររបស់អ៊ីស្រាអែល បានធ្វើឲ្យអគាររាបដល់ដី ។

យន្តហោះចម្បាំងអ៊ីស្រាអែល បានវាយប្រហារតំបន់ភាគកណ្តាលទីក្រុងបេរូត នៅព្រឹកថ្ងៃពុធនេះ ដោយបំផ្លិចបំផ្លាញអគារផ្ទះល្វែង ក្នុងតំបន់ដែលរងការវាយប្រហារយ៉ាងខ្លាំងក្លាបំផុតនៅកណ្តាលរដ្ឋធានីប្រទេសលីបង់មួយនេះ ស្របពេលសង្រ្គាមសហរដ្ឋអាមេរិក-អ៊ីស្រាអែលលើអ៊ីរ៉ង់ ។

មុនការវាយប្រហារលើសង្កាត់ Bachoura យោធាអ៊ីស្រាអែល បានចេញការព្រមាននៅលើបណ្តាញព័ត៌មានសង្គមថា អគារនឹងក្លាយជាគោលដៅវាយប្រហារ គឺត្រូវបានប្រើប្រាស់ដោយក្រុមហេសបូឡា ។

លោក Abu Khalil ដែលរស់នៅតំបន់នោះ និយាយថា លោកបានជួយមនុស្សឲ្យរត់ភៀសខ្លួនចេញពីផ្ទះជិតខាង នៅព្រឹកនេះ ក្រោយការព្រមានរបស់អ៊ីស្រាអែល ។

លោកនិយាយប្រាប់ទីភ្នាក់ងារព័ត៌មានរ៉យទ័រថា វាគឺជាប្រតិបត្តិការមួយគ្រាន់តែធ្វើឲ្យពួកយើងឈឺចាប់ប៉ុណ្ណោះ ធ្វើឲ្យមនុស្សភ័យខ្លាច ធ្វើឲ្យក្មេងៗខ្លាចរអារ ពីព្រោះថា គ្មានគោលដៅយោធានៅទីនោះឡើយ ។

យោងតាមការអះអាងរបស់អាជ្ញាធរលីបង់ បានឲ្យដឹងថា ពុំមានការព្រមានស្រដៀងគ្នាធ្វើឡើងនោះទេ សម្រាប់ការវាយប្រហារលើអគារផ្ទះល្វែង នៅស្រុកភាគកណ្តាល ២កន្លែងផ្សេងទៀត ដែលបានសម្លាប់មនុស្ស ១២នាក់ ។

ស្របពេលដែលអ៊ីស្រាអែលវាយប្រហារតំបន់ជាយក្រុងភាគខាងត្បូងទីក្រុងបេរូត គ្រប់គ្រងដោយក្រុមហេសបូឡាអស់រយៈពេលជាច្រើនថ្ងៃមកហើយ ការវាយប្រហារចុងក្រោយនេះ ស្ថិតក្នុងចំណោមការវាយប្រហារដ៏អាក្រក់បំផុត លើតំបន់ភាគកណ្តាលទីក្រុងបេរូត ក្នុងរយៈពេលជាច្រើនទសវត្សរ៍កន្លងមកនេះ ៕