ការ៉ាតេ៖ លោក Arivalagan Ponniyah នាយកបច្ចេកទេសក្រុមការ៉ាតេជម្រើសជាតិម៉ាឡេស៊ី បានបង្ហាញសុទិដ្ឋិនិយមថា កម្ពុជានឹងរៀបចំការប្រកួតកីឡាស៊ីហ្គេមឆ្នាំ២០២៣ ដោយជោគជ័យ បន្ទាប់ពីឆ្លងកាត់ការរៀបចំការប្រកួតកីឡាការ៉ាតេជ្រើសរើសជើងឯកអាស៊ីអាគ្នេយ៍លើកទី៩ យ៉ាងល្អប្រសើរកាលពីថ្មីៗ។
ថ្នាក់ដឹកនាំកីឡាការ៉ាតេម៉ាឡេស៊ីរូបនេះបានថ្លែងកោតសរសើរចំពោះប្រទេសកម្ពុជា ទោះបីទើបរៀបចំព្រឹត្តិការណ៍អន្តរជាតិនេះលើកដំបូង តែការរៀបចំពិតជាល្អខ្លាំង ទាំងការស្នាក់នៅ ហូបចុក និងធ្វើដំណើរ។ តាមរយៈនេះលោករំពឹងថា ជាសញ្ញាណវិជ្ជមានក្នុងដំណើរឆ្ពោះទៅធ្វើម្ចាស់ផ្ទះ ព្រឹត្តិការណ៍ស៊ីហ្គេមលើកដំបូងនាឆ្នាំ២០២៣ ហើយលោកសង្ឃឹមថានឹងបានដឹកនាំក្រុមមកចូលរួមជាថ្មីទៀតផង។
គួរបញ្ជាក់ថា ម៉ាឡេស៊ីបានបញ្ជូនប្រតិភូ និងអត្តពលិកសរុបជាង ៤០នាក់មកចូលរួមប្រកួតកីឡាការ៉ាតេជើងឯកអាស៊ាននៅកម្ពុជាកាលពីចុងសប្ដាហ៍កន្លងទៅ ហើយបញ្ចប់ជាមួយលទ្ធផលដ៏ល្អប្រសើរដោយឈរលេខ៣ ក្នុងចំណោម ៩ប្រទេសបន្ទាប់ពីដណ្ដើមបានមេដាយមាស ៥ ប្រាក់ ៣ និងសំរឹទ្ធ ៤ សរុប ១២គ្រឿង តាមពីក្រោយវៀតណាមដែលឈរកំពូលតារាងឈ្នះមេដាយមាស ៥ ប្រាក់ ៥ និងសំរឹទ្ធ ៣ និងឥណ្ឌូនេស៊ីដែលឈរលេខ២ ឈ្នះមេដាយមាស ៥ ប្រាក់ ៣ និងសំរឹទ្ធ ៦។ រីឯកម្ពុជាឈរលេខ៤ ឈ្នះមេដាយមាស ១ ប្រាក់ ១ និងសំរឹទ្ធ ៥៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
