ក្នុងកិច្ចប្រជុំកំពូលមួយក្នុងទីក្រុងព្រុចសែល ថ្ងៃព្រហស្បតិ៍ (១៩ មីនា) នេះ បណ្ដាមេដឹកនាំសហភាពអឺរ៉ុប រំពឹងថានឹងដាក់សម្ពាធយ៉ាងខ្លាំងលើនាយករដ្ឋមន្ត្រីហុងគ្រី លោក Viktor Orban ដើម្បីឱ្យលោកដកការរារាំងលើប្រាក់កម្ចីដ៏សំខាន់ចំនួន ៩០ពាន់លានអឺរ៉ូ (ប្រមាណ ១០៣ពាន់លានដុល្លារ) របស់ប្លុកអឺរ៉ុប ទៅឱ្យអ៊ុយក្រែន ដើម្បីបន្តការប្រយុទ្ធប្រឆាំងនឹងប្រតិបត្តិការយោធារបស់រុស្ស៊ី។

មេដឹកនាំប្លុកអឺរ៉ុប បានឯកភាពលើឥណទាននេះតាំងតែពីខែធ្នូ ឆ្នាំមុនមកម៉្លេះ ប៉ុន្តែលោក Orban ដែលមានទំនាក់ទំនងល្អជាមួយរុស្ស៊ី និងបានប៉ះទង្គិចពាក្យសម្តីជាញឹកញាប់ជាមួយលោកប្រធានាធិបតីអ៊ុយក្រែន Volodymyr Zelenskyy បានរារាំងមិនឱ្យអនុវត្តដំណើរការឥណទាននេះបានឡើយកាលពីខែមុន ដោយលើកឡើងពីវិវាទជុំវិញបំពង់បង្ហូរប្រេងដែលរងការខូចខាតដោយសារសង្រ្គាម។

មន្ត្រីជាច្រើនបាននិយាយថា បំពង់បង្ហូរប្រេង Druzhba ដែលដឹកជញ្ជូនប្រេងរុស្ស៊ីឆ្លងកាត់អ៊ុយក្រែន ទៅកាន់ហុងគ្រី និងស្លូវ៉ាគី បានរងការខូចខាតដោយសារការវាយប្រហាររបស់រុស្ស៊ី កាលពីខែមករា។ អ៊ុយក្រែននិយាយថា ខ្លួននឹងត្រូវចំណាយពេលមួយរយៈដើម្បីជួសជុល ប៉ុន្តែហុងគ្រីអះអាងថា បំពង់បង្ហូរប្រេងនេះគឺរួចរាល់អាចដំណើរការបានហើយ។ 

ក្នុងកិច្ចប្រជុំកំពូលនេះ ក្រុមអ្នកការទូតនិយាយថា មេដឹកនាំដទៃទៀតនៃប្លុកដែលមានសមាជិក ២៧ប្រទេសនេះ រំពឹងថានឹងលើកយកកិច្ចព្រមព្រៀងរបស់លោក Zelenskyy ក្នុងសប្តាហ៍នេះ ដើម្បីជួសជុលបំពង់បង្ហូរប្រេងដោយមានជំនួយបច្ចេកទេស និងមូលនិធិពីសហភាពអឺរ៉ុប មកធ្វើជាសំអាង ដើម្បីដាក់សម្ពាធឱ្យលោក Orban បោះបង់ការជំទាស់របស់លោកចំពោះប្រាក់កម្ចីនេះ។ ជំហររបស់លោក Orban បានបង្កឱ្យមានការខឹងសម្បារក្នុងចំណោមមេដឹកនាំប្លុកអឺរ៉ុបផ្សេងទៀត ខណៈទីក្រុងគីវ នឹងខ្វះខាតថវិកាក្នុងពេលប៉ុន្មានសប្តាហ៍ដ៏ខ្លីខាងមុខ ប្រសិនបើមិនទទួលបានមូលនិធិថ្មីទេនោះ៕