សារព័ត៌មានរ៉យទ័របានរាយការណ៍កាលពីថ្ងៃពុធ (១៨ មីនា) ដោយដកស្រង់សម្ដីអ្នកវិភាគថា វិបត្តិថាមពលដែលបណ្តាលមកពីសង្រ្គាមអ៊ីរ៉ង់ បានធ្វើឱ្យអ្នកបង្កើតគោលនយោបាយជុំវិញពិភពលោក ត្រឡប់មកពិចារណាឡើងវិញនូវមធ្យោបាយកាត់បន្ថយការពឹងផ្អែករយៈពេលវែងលើការនាំចូលប្រេង និងឧស្ម័ន ជាមួយនឹងសំណើពង្រីកថាមពលនុយក្លេអ៊ែរ និងថាមពលកកើតឡើងវិញ បង្កើនការស្តុកទុកជាយុទ្ធសាស្ត្រ និងផលិតកម្មក្នុងស្រុក ក៏ដូចជាការធ្វើពិពិធកម្មប្រភពផ្គត់ផ្គង់ពីបរទេសផងដែរ។

ច្រកសមុទ្រហ័រមូស ដែលជាផ្លូវនាវាចរណ៍ដ៏សំខាន់សម្រាប់អត្រា ២០% នៃការផ្គត់ផ្គង់ប្រេង និងឧស្ម័នធម្មជាតិរាវរបស់ពិភពលោក ត្រូវបានបិទដោយអ៊ីរ៉ង់ បន្ទាប់ពីការវាយប្រហាររបស់អាមេរិក និងអ៊ីស្រាអែល កាលពីថ្ងៃទី២៨ ខែកុម្ភៈ ដែលបង្កវិបត្តិថាមពលសកល។ នេះគឺជាលើកទីបីហើយក្នុងទសវត្សរ៍នេះ ដែលវិបត្តិថាមពលអន្តរជាតិបានបង្ខំឱ្យរដ្ឋាភិបាលនានា ត្រូវគិតគូរពីហានិភ័យនៃពិភពលោកដែលពឹងផ្អែកខ្លាំងពេកលើលំហូរដោយសេរីនៃប្រេងឥន្ធនៈ។

វិបត្តិនេះក៏ជំរុញឱ្យមានទស្សនៈថា យុគសម័យឥន្ធនៈហ្វូស៊ីលត្រូវតែបញ្ចប់។ ប្រទេសនានាដែលប្រើថាមពលធំជាងគេបំផុតលើពិភពលោក ឥឡូវនេះកំពុងត្រឡប់ទៅរៀបចំផែនការសារជាថ្មីវិញ។ កាលពីសប្តាហ៍មុន អឺរ៉ុបបានបង្ហាញនូវការធានាហិរញ្ញវត្ថុថ្មីៗសម្រាប់ថាមពលអាតូមិក បន្ទាប់ពីបានបិទរោងចក្រនុយក្លេអ៊ែរអស់រាប់ទសវត្សរ៍មកហើយ។ ចំណែកប្រទេសនាំចូលធំៗផ្សេងទៀត កំពុងរៀបចំផែនការស្វែងរកប្រភពឥន្ធនៈពីអ្នកផ្គត់ផ្គង់ចម្រុះជាច្រើន ដើម្បីទប់ស្កាត់ហានិភ័យ។

លោក Wang Jin សមាជិកជាន់ខ្ពស់នៅស្ថាប័នស្រាវជ្រាវមួយនៅចិន បានប្រាប់ទីភ្នាក់ងារសារព័ត៌មានរ៉យទ័រថា៖ «នៅទូទាំងពិភពលោក រដ្ឋាភិបាលនានានឹងពិចារណាឡើងវិញនូវខ្សែច្រវាក់ផ្គត់ផ្គង់ថាមពល និងប្រព័ន្ធផលិតកម្មរបស់ពួកគេ ហើយប្រហែលជានឹងយកចិត្តទុកដាក់កាន់តែខ្លាំងចំពោះថាមពលនុយក្លេអ៊ែរ និងថាមពលស្អាត»៕