ប្រធានាធិបតីឆាដ លោក Mahamat Idriss Deby Itno បានកោះប្រជុំសន្តិសុខបន្ទាន់មួយកាលពីល្ងាចថ្ងៃពុធ បន្ទាប់ពីការវាយប្រហារដោយយានដ្រូនដ៏សាហាវមួយតាមបណ្តោយព្រំដែនឆាដ-ស៊ូដង់ ហើយបានបញ្ជាឲ្យបិទព្រំដែនទាំងស្រុង។ នេះបើយោងតាមសេចក្តីថ្លែងការណ៍ដែលចេញដោយការិយាល័យប្រធានាធិបតីឆាដ។

យោងតាមសេចក្តីថ្លែងការណ៍ ការវាយប្រហារកាលពីថ្ងៃពុធ បានបណ្តាលឲ្យមាន «ជនជាតិឆាដស្លាប់និងរងរបួសជាច្រើននាក់»។ ប្រព័ន្ធផ្សព្វផ្សាយក្នុងស្រុក បានរាយការណ៍ថា មនុស្ស ១៦នាក់ ត្រូវបានសម្លាប់។

សេចក្តីថ្លែងការណ៍បានបញ្ជាក់ថា លោកប្រធានាធិបតី បានចាត់លោកនាយករដ្ឋមន្ត្រី Allamaye Halina ឲ្យបញ្ជូនគណៈប្រតិភូរដ្ឋាភិបាលទៅកាន់កន្លែងកើតហេតុ ដើម្បីវាយតម្លៃទាំងផលប៉ះពាល់ដល់មនុស្ស និងការខូចខាតសម្ភារៈ។

សេចក្តីថ្លែងការណ៍នោះ បានបន្ថែមថា លោកក៏បានបញ្ជាឲ្យកងទ័ពជាតិសងសឹកប្រឆាំងនឹងការវាយប្រហារណាមួយដែលមានប្រភពមកពីស៊ូដង់ផងដែរ។

ប្រទេសឆាដមានព្រំដែនវែង និងមានច្រកចូលជាច្រើនជាមួយស៊ូដង់ ដែលត្រូវបានហ៊ុមព័ទ្ធដោយជម្លោះ ចាប់តាំងពីឆ្នាំ ២០២៣ នៅពេលដែលការប្រយុទ្ធគ្នា បានផ្ទុះឡើង រវាងកងទ័ពស៊ូដង់ និងកងកម្លាំង         គាំទ្ររហ័ស (RSF)៕