អតីតមន្ត្រីសេតវិមាន បាននិយាយកាលពីថ្ងៃពុធថា ប្រធានាធិបតីអាមេរិក លោក Donald Trump អាចនឹងប្រើប្រាស់ជំនួបនៅសេតវិមានជាមួយនាយករដ្ឋមន្ត្រីជប៉ុន នៅថ្ងៃព្រហស្បតិ៍ ទី១៩ ខែមីនា នេះ ដើម្បីដាក់សម្ពាធសុំជំនួយក្នុងសង្រ្គាមអ៊ីរ៉ង់ ដែលរឿងនេះបានដាក់លោកស្រី Sanae Takaichi ឱ្យស្ថិតក្នុងស្ថានភាពដ៏លំបាក ខណៈទីក្រុងតូក្យូកំពុងពិចារណាថា តើខ្លួនអាចផ្តល់ការគាំទ្របានកម្រិតណា។

លោក Trump បានរិះគន់សម្ព័ន្ធមិត្តចំពោះការគាំទ្រដ៏តិចតួចក្នុងយុទ្ធនាការយោធារបស់អាមេរិក-អ៊ីស្រាអែល ប្រឆាំងនឹងអ៊ីរ៉ង់ ហើយលោកបាននិយាយថា អាមេរិកមិនត្រូវការជំនួយអ្វីទាំងអស់។ យ៉ាងណាក៏ដោយ លោកនៅតែបន្តជំរុញឱ្យមាននាវាបន្ថែមទៀតដើម្បីបោសសម្អាតមីន និងអមដំណើរការពារនាវាដឹកប្រេងឆ្លងកាត់ច្រកសមុទ្រហ័រមូស ដែលភាគច្រើនត្រូវបានបិទដោយអ៊ីរ៉ង់។

លោក Trump ធ្វើជាម្ចាស់ផ្ទះស្វាគមន៍លោកស្រី Takaichi សម្រាប់ទស្សនកិច្ចនៅសេតវិមាន ដែលគ្រោងទុកជាយូរមកហើយ។ កាលពីថ្ងៃពុធ លោកស្រី Takaichi បាននិយាយថា លោកស្រីនឹងរំលឹកដល់ប្រធានាធិបតី Trump អំពីអ្វីដែលជប៉ុន «អាចធ្វើបាន និងមិនអាចធ្វើបាន» ទាក់ទងនឹងស្ថានភាពមជ្ឈិមបូព៌ា មុនកិច្ចប្រជុំកំពូលនៅទីក្រុងវ៉ាស៊ីនតោន។ រហូតមកដល់ពេលនេះ លោកស្រី Takaichi មិនទាន់ផ្តល់ជំនួយលើបញ្ហាច្រកសមុទ្រហ័រមូសនៅឡើយទេ។ សម្ព័ន្ធមិត្តអាមេរិកផ្សេងទៀត ដូចជាអាល្លឺម៉ង់ អ៊ីតាលី និងអេស្ប៉ាញ បានបដិសេធមិនចូលរួមក្នុងបេសកកម្មណាមួយនៅតំបន់ឈូងសមុទ្រឡើយ ដែលធ្វើឱ្យលោក Trump ខឹងសម្បាយ៉ាងខ្លាំង។

លោក Chris Johnstone អតីតមន្ត្រីសេតវិមាន បានលើកឡើងថា៖ «ជំនួបនេះក្លាយជាទស្សនកិច្ចដ៏តានតឹងសម្រាប់លោកស្រី Takaichi»។ លោកបន្តថា៖ «នាយករដ្ឋមន្រ្តីជប៉ុនរូបនេះធ្លាប់សង្ឃឹមថា ខ្លួននឹងក្លាយជាអ្នកចុងក្រោយគេដែលអាចជំរុញគំនិតមួយចំនួនរបស់លោក Trump មុនទស្សនកិច្ចរបស់លោកទៅប្រទេសចិន។ ប៉ុន្តែផ្ទុយទៅវិញ លោកស្រីបែរជាក្លាយជាសម្ព័ន្ធមិត្តដំបូងគេដែលត្រូវឆ្លើយតបសំណើសុំជំនួយក្នុងជំនួបដោយផ្ទាល់ជាមួយលោក Trump លើបញ្ហាមជ្ឈិមបូព៌ាទៅវិញ»៕