ម្ចាស់ឆ្នោតក្នុងប្រទេសជាង៥០ នៅទូទាំងពិភពលោក កំពុងប្រឈមមុខនឹងភាពចលាចលដែលមិនធ្លាប់មានពីមុនមក ទាំងបញ្ហាសង្រ្គាមជាច្រើនកន្លែង ក៏ដូចជាភាពវឹកវរផ្នែកពន្ធគយ ខណៈពួកគេត្រៀមទម្លាក់សន្លឹកឆ្នោតរបស់ខ្លួននៅឆ្នាំ២០២៦ នេះ ជាមួយនឹងឱកាសដ៏កម្រក្នុងការបង្ហាញឱ្យច្បាស់នូវទស្សនៈរបស់ពួកគេលើយុទ្ធសាស្ត្ររបស់រដ្ឋាភិបាល ចំពោះសង្រ្គាម ពន្ធគយ និងជម្លោះសេដ្ឋកិច្ច។

ការបោះឆ្នោតពាក់កណ្តាលអាណត្តិរបស់អាមេរិក ក្នុងខែវិច្ឆិកា ខាងមុខ នឹងកំណត់ថា តើបក្សណាជាអ្នកគ្រប់គ្រងសភា ហើយនោះគឺជាការសាកល្បងដ៏សំខាន់សម្រាប់លោកប្រធានាធិបតីអាមេរិក Donald Trump ជាពិសេសប្រសិនបើសង្រ្គាមមជ្ឈិមបូព៌ា នៅតែបន្តអូសបន្លាយ។ ការដាក់ភ្នាល់លើគោលនយោបាយការបរទេសរបស់លោក Trump អាចនឹងរារាំងឱកាសរបស់បក្សសាធារណរដ្ឋ ខណៈម្ចាស់ឆ្នោតផ្តោតលើក្ដីបារម្ភថ្លៃចំណាយ ស្របពេលតម្លៃប្រេង ហក់ឡើងយ៉ាងគំហុក។

នៅដាណឺម៉ាក នាយករដ្ឋមន្ត្រី លោកស្រី Mette Frederiksen ចង់ទាញប្រយោជន៍ពីកំណើនការគាំទ្រលើជំហររបស់លោកស្រី ប្រឆាំងនឹងសម្ពាធរបស់អាមេរិក លើបញ្ហាកោះហ្គ្រីនលែន ក្នុងការបោះឆ្នោតសភាដែលនឹងប្រព្រឹត្តទៅនៅថ្ងៃអង្គារ ទី២៤ ខែមីនា សប្ដាហ៍ក្រោយនេះ។ នៅហុងគ្រី ការបោះឆ្នោតថ្ងៃទី១២ ខែមេសា គឺជាការគំរាមកំហែងដ៏ធំបំផុតចំពោះនាយករដ្ឋមន្ត្រីជាតិនិយមហុងគ្រី លោក Viktor Orban ដោយមានបក្សប្រឆាំងកណ្តាលនិយមស្តាំ កំពុងនាំមុខក្នុងការស្ទង់មតិភាគច្រើន។

នៅចក្រភពអង់គ្លេស ការបោះឆ្នោតក្នុងស្រុកជាធម្មតាមិនសូវទាក់ទាញការចាប់អារម្មណ៍ពីវិនិយោគិនបរទេសទេ ប៉ុន្តែការបោះឆ្នោតនៅថ្ងៃទី៧ ខែឧសភា ខាងមុខនេះ អាចនឹងមានលក្ខណៈខុសប្លែកពីមុន។ នៅអេត្យូពី និងហ្សំប៊ី ដែលសុទ្ធតែខកខានក្នុងការសងបំណុលសាធារណៈ នឹងបោះឆ្នោតនៅរដូវក្តៅឆ្នាំនេះ ដោយសេដ្ឋកិច្ចគឺជាកង្វល់ចម្បងរបស់ប្រជាជន។ ការបោះឆ្នោតផ្សេងៗក្នុងប្រទេសជាច្រើនទៀត រួមមាន កូឡុំប៊ី ប៉េរូ អ៊ីស្រាអែល និងប្រេស៊ីល ក៏នឹងឃើញមានបញ្ហាប្រឈមផងដែរ ខណៈការកើនឡើងតម្លៃប្រេង និងឥន្ធនៈទូទាំងពិភពលោក អាចធ្វើឱ្យអ្នកបោះឆ្នោតមានការខឹងសម្បា៕