ប្រទេសគូវ៉ែតចាប់ខ្លួនជនសកម្មប្រយុទ្ធ ១០នាក់ ដែលមានទំនាក់ទំនងជាមួយក្រុមហេសបូឡាលីបង់ដែលគាំទ្រដោយអ៊ីរ៉ង់កាលពីថ្ងៃពុធ ដែលត្រូវបានចោទប្រកាន់ពីបទរៀបចំផែនការ «ភេរវកម្ម» ប្រឆាំងនឹងហេដ្ឋារចនាសម្ព័ន្ធសំខាន់ៗ។ នេះបើយោងតាមក្រសួងមហាផ្ទៃ។

នេះគឺជាក្រុមទី២ ដែលមានទំនាក់ទំនងជាមួយហេសបូឡា ត្រូវបានចាប់ខ្លួននៅក្នុងប្រទេសគូវ៉ែត ក្នុង     សប្តាហ៍នេះ ខណៈដែលឈូងសមុទ្រប្រឈមនឹងការវាយប្រហាររៀងរាល់ថ្ងៃរបស់អ៊ីរ៉ង់ ក្នុងអំឡុងសង្គ្រាមមជ្ឈិមបូព៌ា ដែលបានឃើញក្រុមដែលគាំទ្រដោយទីក្រុងតេអេរ៉ង់ រួមទាំងហេសបូឡាចូលរួមក្នុងជម្លោះនេះ។

ក្រសួងមហាផ្ទៃ បាននិយាយថា៖«ទីភ្នាក់ងារសន្តិសុខរដ្ឋបានរារាំងដោយជោគជ័យនូវផែនការសម្រាប់ប្រតិបត្តិការភេរវកម្មដែលកំណត់គោលដៅទីតាំងសំខាន់ៗ»។

ក្រសួងបានបន្ថែមថា៖«ពលរដ្ឋ ១០នាក់ ជាសមាជិកនៃក្រុមភេរវករដែលមានទំនាក់ទំនងជាមួយអង្គការភេរវកម្មហេសបូឡាដែលត្រូវបានហាមឃាត់ ត្រូវបានចាប់ខ្លួន»។

ក្រសួងបានចែករំលែកវីដេអូនៃវត្ថុដែលរឹបអូសបាន រួមទាំងទង់ជាតិហេសបូឡា យានដ្រូនតូចៗជាច្រើនគ្រឿង និងរូបថតរបស់មេដឹកនាំកំពូលអ៊ីរ៉ង់ លោក Ayatollah Ali Khamenei ដែលត្រូវបានសម្លាប់ និងអតីតមេដឹកនាំក្រុមហេសបូឡា លោក Hassan Nasrallah ដែលត្រូវបានសម្លាប់ នៅក្នុងការវាយប្រហាររបស់អ៊ីស្រាអែល។

កាលពីថ្ងៃចន្ទ ក្រសួងមហាផ្ទៃគូវ៉ែត បាននិយាយថា ខ្លួនបានចាប់ខ្លួនមនុស្ស ១៦នាក់  ជនជាតិគូវ៉ែត ១៤នាក់ និងជនជាតិលីបង់ ២នាក់  ដែលមានទំនាក់ទំនងជាមួយក្រុមហេសបូឡា ដែលបានរៀបចំ «ផែនការវាយប្រហារ»៕