យោងតាមការចុះផ្សាយរបស់សារព័ត៌មាន Izvestia នៅថ្ងៃព្រហស្បតិ៍ (១៩ មីនា) នេះដោយដកស្រង់សម្តីមន្ត្រីរុស្ស៊ី បានឱ្យដឹងថា កិច្ចចរចាសន្តិភាពរវាងរុស្ស៊ី និងអ៊ុយក្រែន ដែលសម្របសម្រួលដោយសហរដ្ឋអាមេរិក ត្រូវបានផ្អាកជាបណ្តោះអាសន្ន ស្របពេលមានសង្រ្គាមនៅអ៊ីរ៉ង់។ សារព័ត៌មាន Izvestia បាននិយាយថា វិមានក្រឹមឡាំងបានបញ្ជាក់ពីការផ្អាកនេះ ហើយថា សង្រ្គាមអ៊ីរ៉ង់ អាចនឹងរុញច្រានទីក្រុងគីវ ឱ្យឈានទៅរកការសម្រុះសម្រួល។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា លោក Kirill Dmitriev ប្រេសិតរបស់ប្រធានាធិបតីរុស្ស៊ី នឹងបន្តធ្វើការលើការវិនិយោគ និងកិច្ចសហប្រតិបត្តិការសេដ្ឋកិច្ច ប៉ុន្តែកិច្ចចរចាត្រីភាគីត្រូវបានផ្អាកសិន។ សារព័ត៌មាន Izvestia បានស្រង់សម្តីលោក Peskov ដែលនិយាយថា៖ «លោក Dmitriev កំពុងបន្តការងារ។ ក្រុមមន្រ្តីត្រីភាគីគឺស្ថិតក្នុងស្ថានភាពផ្អាកបណ្តោះអាសន្ន»។

កិច្ចចរចាដែលសម្របសម្រួលដោយសហរដ្ឋអាមេរិក រវាងប្រតិភូរុស្ស៊ី និងអ៊ុយក្រែន ដែលរហូតមកដល់ពេលនេះមិនទាន់ទទួលបានវឌ្ឍនភាពគួរឱ្យកត់សម្គាល់លើបញ្ហាសំខាន់ៗនៅឡើយនោះ ហាក់បាត់បង់សន្ទុះ ស្របពេលជម្លោះនៅមជ្ឈិមបូព៌ា កាន់តែខ្លាំងក្លាឡើង។

ក្រៅពីការបង្វែរការយកចិត្តទុកដាក់ចេញពីកិច្ចប្រឹងប្រែងសន្តិភាពអ៊ុយក្រែន សង្រ្គាមនៅអ៊ីរ៉ង់ក៏កំពុងធ្វើឱ្យបាត់បង់ស្តុកមីស៊ីលរបស់សហរដ្ឋអាមេរិកសម្រាប់ការពារដែនអាកាសអ៊ុយក្រែនផងដែរ ដែលជាប្រភេទសព្វាវុធមានសារៈសំខាន់យ៉ាងខ្លាំងចំពោះទីក្រុងគីវ ក្នុងការបាញ់ទម្លាក់មីស៊ីលរបស់រុស្ស៊ី៕