​សហរដ្ឋអាមេរិក៖ តារា​សម្ដែង​ភាពយន្ត តារា​ចម្រៀង rap និង​ជា​ផលិតករ​ភាពយន្ត​ជនជាតិ​អាមេរិក​ស្បែក​ខ្មៅ​ដ៏​ល្បី​គឺ​លោក Will Smith បាន​សុំ​អភ័យទោស​ចំពោះ​តារា​កំប្លែង និង​ជា​ផលិតករ​ភាពយន្ត​អាមេរិក​ស្បែក​ខ្មៅ​លោក Chris Rock បន្ទាប់ពី​លោក​បាន​ទះកំផ្លៀង​តារា​កំប្លែង​រូប​នេះ​នៅ​កម្មវិធី​ប្រគល់​ពានរង្វាន់ Oscars ដោយ​និយាយ​ថា ឥរិយាបថ​របស់​លោក​មិន​អាច​ទទួល​យក​បាន និង​ជា​កំហុស​ឆ្គង​មិន​អាច​ប្រកែក​បាន​។

​លោក​បាន​និយាយ​នៅ​ក្នុង​សេចក្ដីថ្លែងការណ៍​មួយ​ថា ខ្ញុំ​ចង់​សូម​អភ័យទោស​ជា​សាធារណៈ​ចំពោះ​អ្នក Chris។​ ខ្ញុំ​មាន​អារម្មណ៍​ច្រឡោត​ខ្លាំងពេក ខ្ញុំ​ខុស​ហើយ​។​ ឧបទ្ទវ​ហេតុនេះ​បាន​កើត​ឡើង បន្ទាប់ពី​កម្មវិធី​ប្រគល់​ពានរង្វាន់​ភាពយន្ត​ Oscars បាន​ថ្កោលទោស Smith ដោយសារតែ​រឿង​នេះ។ លោក Will Smith បាន​ទះកំផ្លៀង​លោក Rock នៅ​លើ​ឆាក​ ក្រោយ​តារា​កំប្លែង​រូប​នេះ​បាន​លើក​យក​ភរិយា​របស់​លោក​គឺ​លោកស្រី Jada Pinkett Smith មកលេង​សើច​នៅ​កណ្ដាល​ហ្វូង​មនុស្ស​ដ៏​ច្រើន​។​

​លោក Rock បាន​និយាយ​ដោយ​សំដៅ​ដល់​សក់​ក្បាល​របស់​លោកស្រី Pinkett Smith ដែល​បាន​កោ​សក់​ដោយ​សារ​តែ​នាង​មាន​ជំងឺ​ជ្រុះ​សក់​។​ ​គួរ​រម្លឹក​ថា​ ឧបទ្ទវហេតុ​នេះ​បាន​កើត​ឡើង​បន្ទាប់ពី​លោក Chris Rock បាន​និយាយ​លេង​ថា Jada Smith ភរិយា​លោក Will Smith អាច​ក្លាយ​ជា​តួអង្គ​ក្នុង​រឿង G.I. Jane ដោយសារតែ Jada អត់​មាន​សក់ ព្រោះ​នាង​មាន​ជំងឺ​ជ្រុះ​សក់​៕

អត្ថបទ៖ សុខមាន