លោក Daniel Zimmermann ឧបការីរដ្ឋមន្ត្រីការពារជាតិអាមេរិកទទួលបន្ទុកកិច្ចការសន្តិសុខអន្តរជាតិ បាននិយាយថា មន្ទីរបញ្ចកោណបើកចំហចំពោះការរក្សាបណ្តាញទំនាក់ទំនងជាមួយយោធារុស្ស៊ី ដើម្បីទប់ស្កាត់ការកើនឡើងភាពតានតឹង និងការប៉ះទង្គិចគ្នាដោយចៃដន្យ។  

លោក Zimmerman បានលើកឡើងនៅក្នុងសេចក្តីថ្លែងការណ៍ជាលាយលក្ខណ៍អក្សរសម្រាប់សវនាការ នៅក្នុងសភាតំណាងរាស្ត្រថា៖«ក្រសួងការពារជាតិ បើកចំហចំពោះការជំរុញការសន្ទនារវាងយោធានិងយោធា ជាមួយសហព័ន្ធរុស្ស៊ី រួមទាំងការគាំទ្រដល់ការចរចាដឹកនាំដោយក្រសួងការបរទេស បន្ទាប់ពីការផុតកំណត់នៃសន្ធិសញ្ញាកាត់បន្ថយអាវុធនុយក្លេអ៊ែរ (New START) និងការសន្ទនាយោធាកម្រិតខ្ពស់ដែលបានប្រកាសកាលពីខែមុន ដោយអគ្គមេបញ្ជាការនៃកងកម្លាំងប្រដាប់អាវុធចម្រុះណាតូនៅអឺរ៉ុប លោក ឧត្តមសេនីយ៍ Alexus] Grynkewich»។

លោកបាននិយាយថា សហរដ្ឋអាមេរិកនៅតែចាប់អារម្មណ៍លើស្ថិរភាពជាយុទ្ធសាស្ត្រ និងការរក្សាបណ្តាញសម្រាប់ការបន្ធូរបន្ថយជម្លោះយោធា និងការបន្ថយភាពតានតឹងជាមួយរុស្ស៊ី ដែលអស់រយៈពេលជាច្រើនទសវត្សរ៍មកហើយ បានកាត់បន្ថយឱកាសនៃការគណនាខុសរវាងយោធានៃប្រទេសទាំងពីរ៕