ទីភ្នាក់ងារស៊ើបការណ៍សម្ងាត់អាមេរិក កាលពីថ្ងៃពុធ (ទី១៨ ខែមីនា ឆ្នាំ២០២៦) បានសន្និដ្ឋានថា អ៊ីរ៉ង់មិនបាននិងកំពុងកសាងសមត្ថភាពចម្រាញ់សារធាតុនុយក្លេអ៊ែរឡើងវិញឡើយ បន្ទាប់ពីត្រូវបានបំផ្លាញ កាលពីឆ្នាំមុន ដោយសហរដ្ឋអាមេរិក និងអ៊ីស្រាអែល ដែលផ្ទុយនឹងយុត្តិកម្មសំខាន់របស់លោកប្រធានាធិបតី Donald Trump ដើម្បីធ្វើសង្គ្រាមដែលកំពុងបន្តមានរបស់លោក។

សម្ព័ន្ធមិត្តរបស់លោក Trump គឺលោកស្រី Tulsi Gabbard ដែលជានាយកស៊ើបការណ៍សម្ងាត់ជាតិ បានផ្តល់សញ្ញាចម្រុះ នៅក្នុងបរិបទនៃសភាពការណ៍ និងលទ្ធផលនៃសង្គ្រាមរយៈពេល ៣សប្តាហ៍ ខណៈដែលលោកស្រី និងមន្ត្រីផ្សេងទៀតបានបង្ហាញខ្លួននៅចំពោះមុខសភា។ លោកស្រីក៏បានវាយតម្លៃផងដែរថា ថ្នាក់ដឹកនាំអ៊ីរ៉ង់ នៅតែមិនរងប៉ះពាល់អ្វីឡើយ។

អំឡុងពេលផ្តល់សក្ខីកម្មដែលត្រូវបានរៀបចំ ទៅកាន់គណៈកម្មាធិការស៊ើបការណ៍សម្ងាត់ព្រឹទ្ធសភា ដោយសំដៅទៅលើការវាយប្រហាររបស់សហរដ្ឋអាមេរិក កាលពីខែមិថុនា ឆ្នាំ២០២៥ លោកស្រី Gabbard បានបញ្ជាក់ថា៖ «ជាលទ្ធផលនៃប្រតិបត្តិការ Midnight Hammer កម្មវិធីចម្រាញ់នុយក្លេអ៊ែររបស់អ៊ីរ៉ង់ ត្រូវបានបំផ្លាញ»។ លោកស្រី Gabbard បានសង្កត់ធ្ងន់ថា៖ «មិនមានកិច្ចប្រឹងប្រែងណាមួយឡើយ ចាប់តាំងពីពេលនោះ ដើម្បីព្យាយាមកសាងសមត្ថភាពចម្រាញ់របស់ពួកគេឡើងវិញ»។

លោក Trump បានលើកឡើងម្តងហើយម្តងទៀតថា លោកបានបញ្ជាឲ្យវាយប្រហារអ៊ីរ៉ង់ រួមជាមួយអ៊ីស្រាអែល កាលពីថ្ងៃទី២៨ ខែកុម្ភៈ ដោយសារតែ «ការគំរាមកំហែងជិតកើតមាន»។ លោក Trump បាននិយាយបន្ទាប់ពីការទម្លាក់គ្រាប់បែកក្នុងខែមិថុនា ឆ្នាំ២០២៥ថា សហរដ្ឋអាមេរិកបានបំផ្លាញទីតាំងនុយក្លេអ៊ែររបស់អ៊ីរ៉ង់ទាំងស្រុង ប៉ុន្តែចាប់តាំងពីមានសង្គ្រាមចុងក្រោយរបស់លោក លោកបានអះអាងថា ទីក្រុងតេអេរ៉ង់ នៅតែប៉ុន្មានសប្ដាហ៍ទៀតប៉ុណ្ណោះឈានដល់ការផលិតបានគ្រាប់បែកនុយក្លេអ៊ែរ ហេតុដូច្នេះ លោកត្រូវតែចាត់វិធានការ៕