នៅថ្ងៃព្រហស្បតិ៍ (ទី១៩ ខែមីនា ឆ្នាំ២០២៦) នេះ ប្រទេសជប៉ុនបានបដិសេធការវាយតម្លៃរបស់សហរដ្ឋអាមេរិក ដែលថា ជំហររបស់ខ្លួន បានផ្លាស់ប្ដូរយ៉ាងខ្លាំង ពាក់ព័ន្ធនឹងការមានប្រតិកម្ម ចំពោះការវាយប្រហាររបស់ចិន លើកោះតៃវ៉ាន់ ជាបញ្ហាមួយដែលអាចធ្វើឲ្យកិច្ចប្រជុំកំពូលមេដឹកនាំដែលជិតមកដល់ រវាងទីក្រុងតូក្យូ និងវ៉ាស៊ីនតោន មានភាពច្របូកច្របល់។

ការអត្ថាធិប្បាយរបស់នាយករដ្ឋមន្ត្រីជប៉ុន លោកស្រី Sanae Takaichi កាលពីចុងឆ្នាំមុន ដែលថា ប្រសិនបើមានការវាយប្រហារលើកោះតៃវ៉ាន់ អាចនាំឲ្យមានការឆ្លើយតបខាងយោធាពីទីក្រុងតូក្យូបានទាក់ទាញឲ្យមានប្រតិកម្មយ៉ាងខ្លាំងពីទីក្រុងប៉េកាំង ដែលចាត់ទុកកោះនេះជាទឹកដីរបស់ខ្លួន។ បើទោះបីជាលោកស្រី Takaichi បានអះអាងថា ការកត់សម្គាល់របស់លោកស្រីស្របតាមគោលនយោបាយយូរអង្វែងរបស់ជប៉ុនក៏ដោយ ក៏របាយការណ៍ប្រចាំឆ្នាំរបស់ទីភ្នាក់ងារស៊ើបការណ៍សម្ងាត់អាមេរិក កាលពីថ្ងៃពុធ បានលើកឡើងថា ពួកគេបានងាកចេញយ៉ាងខ្លាំងពីវោហាសាស្ត្ររបស់បណ្ដាមេដឹកនាំជប៉ុនមុនៗ។

អ្នកនាំពាក្យជាន់ខ្ពស់របស់រដ្ឋាភិបាលជប៉ុន លោក Minoru Kihara បានប្រាប់សន្និសីទសារព័ត៌មានមួយនៅថ្ងៃព្រហស្បតិ៍ថា៖ «ការវាយតម្លៃ ដែលថា មានការផ្លាស់ប្តូរខ្លាំង គឺមិនត្រឹមត្រូវឡើយ»។ លោកបានបន្ថែមថា ជំហររបស់ទីក្រុងតូក្យូ ក្នុងការវិនិច្ឆ័យស្ថានភាព ដែលហៅថា «ស្ថានភាពវិបត្តិការរស់នៅ» ដែលលោកស្រី Takaichi ត្រូវបានសួរនៅក្នុងសភានៅពេលដែលលោកស្រីបានថ្លែងសុន្ទរកថាកាលពីខែវិច្ឆិកាឆ្នាំមុន ស្តីពីកោះតៃវ៉ាន់ គឺស្របនឹងអតីតកាល។

ទស្សនៈខុសគ្នានេះ អាចបង្កភាពស្មុគស្មាញដល់កិច្ចប្រជុំកំពូលរបស់លោកស្រី Takaichi ជាមួយប្រធានាធិបតីអាមេរិក លោក Donald Trump នៅថ្ងៃព្រហស្បតិ៍ ដែលមានភាពស្មុគស្មាញរួចទៅហើយ ពាក់ព័ន្ធនឹងការទាមទាររបស់លោក ដែលចង់ឲ្យប្រទេសជប៉ុន និងសម្ព័ន្ធមិត្តផ្សេងទៀតបញ្ជូននាវាអមដំណើរទៅកាន់ច្រកសមុទ្រ Hormuz ដែលភាគច្រើនត្រូវបានបិទដោយសារសង្គ្រាមអ៊ីរ៉ង់៕