យោងតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ដោយដកស្រង់សម្តីមន្ត្រីអាមេរិកម្នាក់ និងមនុស្សបីនាក់ដែលដឹងអំពីបញ្ហានេះ បាននិយាយថា រដ្ឋបាលរបស់លោកប្រធានាធិបតី ដូណាល់ ត្រាំ កំពុងពិចារណាដាក់ពង្រាយកងទ័ពរាប់ពាន់នាក់ ដើម្បីពង្រឹងប្រតិបត្តិការរបស់ខ្លួននៅមជ្ឈិមបូព៌ា ខណៈយោធាសហរដ្ឋអាមេរិកកំពុងត្រៀមសម្រាប់ជំហានបន្ទាប់ដែលអាចធ្វើទៅបាននៅក្នុងសង្គ្រាមប្រឆាំងអ៊ីរ៉ង់។

ការដាក់ពង្រាយនេះ អាចជួយផ្តល់ឱ្យលោក ត្រាំ នូវជម្រើសបន្ថែម ខណៈលោកកំពុងថ្លឹងថ្លែងពង្រីកប្រតិបត្តិការរបស់សហរដ្ឋអាមេរិក ដោយសង្គ្រាមអ៊ីរ៉ង់បានឈានចូលដល់សប្តាហ៍ទីបី ក្នុងពេលជាមួយគ្នានៃការពង្រីកបន្ថែមសហរដ្ឋអាមេរិកទៅក្នុងសង្គ្រាមបរទេស ដូចដែលលោកបានសន្យាដដែលៗថា នឹងមិនធ្វើ។

ប្រភពព័ត៌មានបាននិយាយថា ប្រតិបត្តិការរបស់សហរដ្ឋអាមេរិកដែលកំពុងត្រូវបានពិចារណារួមមានការធានាសុវត្ថិភាពសម្រាប់នាវាដឹកប្រេងឆ្លងកាត់ច្រកសមុទ្រ Hormuz ជាបេសកកម្មមួយដែលនឹងត្រូវសម្រេចបានជាចម្បងតាមរយៈកងកម្លាំងអាកាស និងកងទ័ពជើងទឹក។

ប្រភពព័ត៌មានចំនួនបួន រួមទាំងមន្ត្រីអាមេរិកពីរនាក់បាននិយាយថា ការធានាសុវត្ថិភាពច្រកសមុទ្រនេះ ក៏អាចមានន័យថា មានការដាក់ពង្រាយកងទ័ពអាមេរិកទៅកាន់ឆ្នេរសមុទ្រអ៊ីរ៉ង់ផងដែរ។