ឯកសារបង្ហាញថា បណ្ដារដ្ឋឈូងសមុទ្រ បានស្នើឲ្យមានការជជែកដេញដោលបន្ទាន់ នៅក្រុមប្រឹក្សាសិទ្ធិមនុស្សអង្គការសហប្រជាជាតិ (UNHRC) នៅទីក្រុងហ្សឺណែវ ប្រទេសស្វីស ពាក់ព័ន្ធនឹងការវាយប្រហាររបស់អ៊ីរ៉ង់ ទៅលើជនស៊ីវិល និងហេដ្ឋារចនាសម្ព័ន្ធថាមពល នៅទូទាំងតំបន់មជ្ឈិមបូព៌ា។

ឯកសារការទូតដែលត្រូវបានផ្ញើដោយរដ្ឋឈូងសមុទ្រ និងដែលត្រូវបានឃើញដោយសារព័ត៌មាន Reuters បានពិពណ៌នាអំពីការវាយប្រហារដោយមីស៊ីលបាលីស្ទិក និងយានដ្រូនលើប្រទេសបារ៉ែន ហ្ស៊កដានី គុយវ៉ែត អូម៉ង់ កាតា អារ៉ាប៊ីសាអ៊ូឌីត និងអារ៉ាប់រួមអេមីរ៉ាតថា ជា «ស្ថានភាពគួរឲ្យបារម្ភយ៉ាងខ្លាំងចំពោះសន្តិភាព និងសន្តិសុខអន្តរជាតិ» ដែលមានផលប៉ះពាល់ធ្ងន់ធ្ងរដល់សិទ្ធិមនុស្ស។

សង្គ្រាមអាមេរិក-អ៊ីស្រាអែល ដែលកំពុងត្រូវបានពង្រីក នៅអ៊ីរ៉ង់ និងដែលបានចូលដល់សប្តាហ៍ទី៣ ហើយ បានបង្កឲ្យមានការសងសឹកទ្រង់ទ្រាយធំរបស់អ៊ីរ៉ង់ ក្នុងទម្រង់ជាការវាយប្រហារដោយយានដ្រូន និងមីស៊ីល លើហេដ្ឋារចនាសម្ព័ន្ធថាមពល និងស៊ីវិល នៅក្នុងប្រទេសឈូងសមុទ្រ។ ការបិទច្រកសមុទ្រហ័រមូសរបស់អ៊ីរ៉ង់ និងការវាយប្រហារលើកន្លែងផលិតថាមពល នៅទូទាំងតំបន់ បានធ្វើឲ្យតម្លៃថាមពលហក់ឡើង និងបង្កឲ្យមានការភ័យខ្លាច ចំពោះការកើនឡើងនូវអតិផរណាទូទាំងពិភពលោក។

ឯកសារការទូត បានរៀបរាប់ថា «ការវាយប្រហារដែលមិនបានបង្កឡើង» លើប្រទេសឈូងសមុទ្រទោះបីជាមានការធានាដល់ទីក្រុងតេអេរ៉ង់ថា ទឹកដីរបស់ពួកគេ នឹងមិនធ្វើជាទីកន្លែងនៃការបាញ់មីស៊ីលប្រឆាំងអ៊ីរ៉ង់ក៏ដោយ ទាមទារការយកចិត្តទុកដាក់បន្ទាន់។

សេចក្តីព្រាងសេចក្តីសម្រេចដែលស្នើឡើងដោយរដ្ឋឈូងសមុទ្រ បានបង្ហាញការថ្កោលទោសយ៉ាងខ្លាំង និងអំពាវនាវឲ្យអ៊ីរ៉ង់បញ្ឈប់ការវាយប្រហារជាបន្ទាន់ លើហេដ្ឋារចនាសម្ព័ន្ធស៊ីវិល និងនាវាពាណិជ្ជកម្ម នៅក្នុងច្រកសមុទ្រ Hormuz ហើយក៏ស្វែងរកសំណង សម្រាប់ការខូចខាតស៊ីវិល ហេដ្ឋារចនាសម្ព័ន្ធ និងបរិស្ថានផងដែរ៕