នាយករដ្ឋមន្ត្រីជប៉ុន លោកស្រី Sanae Takaichi កំពុងធ្វើដំណើរទៅកាន់អ្វីដែលលោកស្រីរំពឹងថា នឹងក្លាយជាកិច្ចប្រជុំដ៏លំបាកមួយជាមួយមេដឹកនាំអាមេរិក លោក Donald Trump ពោលគឺប៉ុន្មានថ្ងៃបន្ទាប់ពីការអំពាវនាវរបស់លោក ដើម្បីឲ្យសម្ព័ន្ធមិត្តជួយធានាសុវត្ថិភាពច្រកសមុទ្រ Hormuz ដែលរងការវាយប្រហារដោយសង្គ្រាមអ៊ីរ៉ង់ ភាគច្រើនមិនត្រូវបានឆ្លើយតប។

ប៉ុន្មានម៉ោងមុនពេលលោកស្រីចេញដំណើរ លោកស្រី Takaichi បានប្រាប់រដ្ឋសភាថា លោកស្រីនឹង «ធ្វើអ្វីគ្រប់យ៉ាង ដើម្បីសម្រេចបានផលប្រយោជន៍ជាតិ (របស់ជប៉ុន) ធំបំផុត»។ ដំណើរទស្សនកិច្ចរយៈពេល ៣ថ្ងៃ ទៅកាន់ទីក្រុងវ៉ាស៊ីនតោននេះ គឺជាឱកាស ដើម្បីពិភាក្សាអំពីពាណិជ្ជកម្ម និងពង្រឹងសម្ព័ន្ធភាពសហរដ្ឋអាមេរិក-ជប៉ុន មុនពេលមានដំណើរទស្សនកិច្ចការទូតរបស់លោក Trump ទៅកាន់ប្រទេសចិន ដែលឥឡូវនេះត្រូវបានពន្យារពេលដោយសារតែសង្គ្រាម។ ប៉ុន្តែឥឡូវនេះ ប្រធានបទ ពាក់ព័ន្ធនឹងសង្គ្រាមដ៏ក្ដៅគគុក ទំនងជានឹងគ្របដណ្ដប់លើកិច្ចប្រជុំ ដែលកំពុងត្រូវបានបង្កើតឡើង ដើម្បីជាការសាកល្បងមិត្តភាពរបស់លោកស្រី Takaichi ជាមួយលោក Trump។

គិតត្រឹមប៉ុន្មានសប្តាហ៍មុននេះ កិច្ចប្រជុំនាពេលខាងមុខនេះ ហាក់ដូចជាទទួលបានជោគជ័យ ដោយលោកស្រី Takaichi «ទើបតែទទួលបានជ័យជម្នះក្នុងការបោះឆ្នោតដ៏លេចធ្លោ និងមានគម្រោងវិនិយោគជុំថ្មី នៅសហរដ្ឋអាមេរិក»។ នេះបើតាមការលើកឡើងរបស់លោកស្រី Emma Chanlett-Avery នាយិកាកិច្ចការនយោបាយ និងសន្តិសុខ នៅវិទ្យាស្ថានគោលនយោបាយសង្គមអាស៊ី ដែលលបានប្រាប់សារព័ត៌មាន BBC។

តែលោកស្រី Chanlett-Avery បានបញ្ជាក់ថា ព្រឹត្តិការណ៍ថ្មីៗនេះបានធ្វើឲ្យមានភាពស្មុគស្មាញ បើទោះបីជាលោកស្រី Takaichi «មានបំណងបង្កើតភាពកក់ក្តៅនៃកិច្ចប្រជុំលើកដំបូងរបស់លោកស្រីជាមួយលោក Trump និងបង្ហាញដល់រូបលោកនូវក្ដីបារម្ភរបស់ជប៉ុន អំពីឥទ្ធិពលរបស់ចិន មុនពេលមានកិច្ចប្រជុំដែលត្រូវបានកំណត់កាលបរិច្ឆេទឡើងវិញរបស់លោក Trump ជាមួយលោក ស៊ី ជីនពីង»។

ដើមសប្តាហ៍នេះ នៅក្នុងការសារលើវេទិកាបណ្ដាញសង្គម Truth Social លោក Trump បានបង្ហោះសំណើមួយ ដោយអំពាវនាវឲ្យប្រទេសមួយចំនួន ជួយធានាសុវត្ថិភាពច្រកសមុទ្រដ៏សំខាន់នេះ។ លោកបានលើកឡើងពីការពឹងផ្អែករបស់ជប៉ុន និងសេដ្ឋកិច្ចអាស៊ីផ្សេងទៀត លើប្រេងឥន្ធនៈនាំចូលពីមជ្ឈិមបូព៌ា ជាហេតុផល ដើម្បីឲ្យពួកគេចូលរួម។

ប៉ុន្តែបន្ទាប់ពីទទួលបានការឆ្លើយតបមិនប្រកបដោយភាពកក់ក្ដៅ លោក Trump បានដកសំណើនោះវិញ ដោយបញ្ជាក់នៅក្នុងសារមួយថា សហរដ្ឋអាមេរិក ពិតជា «មិនត្រូវការជំនួយពីនរណាម្នាក់ទេ!»។ លោកស្រី Takaichi បានទទួលស្គាល់បញ្ហាប្រឈមដែលលោកស្រីត្រូវជួបប្រទះ ដោយនិយាយមុនពេលលោកស្រីចេញដំណើរកាលពីថ្ងៃពុធថា លោកស្រីបានប្រឈមនឹង «ដំណើរដ៏លំបាក» មួយ៕